दमौली । मंगलबार बसेको जिल्ला कोभिड संकट व्यवस्थापन समिति(डिसीसीएमसी)बैठकले श्रावण ३२ गतेसम्मका लागि निषेधाज्ञालाई निरन्तरता दिन प्रशासनलाई सिफारिस गर्ने निर्णय गरेको छ । तनहुँका प्रमुख जिल्ला अधिकारी सागर आचार्यको अध्यक्षतामा बसेको बैठकले बिहीबार राती सकिने निषेधाज्ञा साउन ३२ गतेसम्मका लागि थप गर्ने निर्णय गरेको सहायक प्रमुख जिल्ला अधिकारी चित्रांगत बरालले बताए ।
साउन ३२ सम्म थपिएको अवधिमा निषेधाज्ञा सम्बन्धी व्यवस्थामा कुनै परिवर्तन भने हुने छैन । आजको बैठकले सक्रिय संक्रमित पाँच सय हाराहारी पुगेकाले कडाई गर्ने निष्कर्ष निकालिएको थियो । ‘अवस्था नियन्त्रणबाहिर जान लागेको छ,’ बरालले भने,‘तर छिमेकका जिल्लामा बन्द नभएकाले पुरै रोक्न सकिने अवस्था पनि छैन ।’
बैठकका क्रममा स्वास्थ्यकर्मी तथा अन्य सहभागीले संक्रमण थप हुन् नदिन बिशेष चाल्नु पर्ने कुरामा जोड दिएका थिए ।
