– हुतमणि अधिकारी
पटकपटक सर्दै आएको र अनिश्चयको भुमरीमा परेको नेपाली कांग्रेसको १४ औं महाधिवेशन अब सुनिश्चित भएको छ। यही भदौ १८ गते हुन गइरहेको वडा अधिवेशनबाट महाधिवेशनको बिधिवत प्रारम्भ हुँदैछ । निर्धारित कार्य तालिका बमोजिम अब क्रमश: वडा तह, पालिका, प्रदेश क्षेत्र, संघीय क्षेत्र, जिल्ला, प्रदेस देखि केन्द्रीय तह सम्म नेतृत्व छनौटको प्रक्रिया आरम्भ हुँदै जानेछ। लोकतान्त्रिक पद्धतिमा नेतृत्व चयनका दुईवटा बाटा हुन्छन् सहमति वा सर्वसम्मति र निर्वाचन ।
नेतृत्व चयनका क्रममा हुने अनावश्यक गुटगत अस्वस्थ प्रतिस्पर्धा र उम्मेदवारहरु विच हुने तिक्ततापुर्ण प्रतिद्वन्दात्मक अवस्थाबाट पार्टीलाई जोगाउन र सबै नेता कार्यकर्ता बीच एकता , मेलमिलाप , सहयोग , सद्भाव र बिस्वास कायम राख्ने वातावरण बनाउन सबै जिम्मेवार नेता कार्यकर्ता इमानदारीपूर्वक लाग्नु पनि जरुरी देखिन्छ । अधिवेशन- महाधिवेशनमा आफुले र आफ्नाले मात्र जित्नु पर्ने , नेतृत्वमा पुग्नुपर्ने संकीर्ण , अहंकार र अधिनायकवादी सोँच सबैले त्याग्नुपर्छ , पार्टीको बृहत्तर हितका लागि व्यक्तिगत, गुटगत स्वार्थ त्याग गर्नैपर्छ । सबै एउटै परिवारका सदस्य हौँ भन्ने भाव लिनुपर्छ । एउटै पार्टीका नेता कार्यकर्ता बीच गुटबन्दीका आधारमा अस्वस्थ , अराजनीतिक , अनुशासन र मर्यादाहीन टिप्पणी , गतिविधि र क्रियाकलाप किमार्थ गर्नुहुँदैन । यस्तो हुन गयो भने निकट भविष्यमा हुन गैरहेको स्थानीय, प्रदेश र संघीय निर्वाचनलाई त्यसले प्रत्यक्ष असर गर्न सक्छ। त्यसैले सकेसम्म सबै तहमा सर्वसम्मत रुपमा समितिहरु चयन गर्ने कोसिस गरौ किनभने सर्वसम्मत प्रक्रियाले पार्टी भित्र मेलमिलाप र हार्दिकताको कायम हुन्छ। कथं निर्वाचन हुने परिस्थिति बनेछ भने पनि स्वच्छ , स्वस्थ , मित्रवत प्रतिस्पर्धा गरौं।खेल भावनाले हारजीतलाइ सहज रुपमा स्वीकार्ने संस्कृतिको विकास गरौं। नेतृत्व चयनका क्रममा हुनसक्ने द्वन्द , प्रतिश्पर्धा , कटुता , बदलाभाव जस्ता कुराहरु प्रति सजग रही आपसमा भेटघाट , छलफल, संवाद गरि निकटता र हार्दिकता बिकास गरौं। संवादहीनता र संपर्कबिहीनताले भ्रम र बिबाद बढाउन सक्ने कुरा तर्फ सबै सजग रहौँ ।
महाधिवेशन संगठनमा नयाँ बिचार , शैली , उर्जा भर्नका लागि हो , परिष्कृत सामयिक मार्ग पहिल्याउनका लागि पनि हो । यसले पार्टी एकता मजवुत तुल्याउनु पर्छ , टुटेका- फुटेका -बिथोलिएका- बहकिएका मन, बुद्धिहरुलाइ एकजुट बनाउन सक्नुपर्छ । महाधिवेशन तोड्ने तोडिने भेला होइन जोड्ने जोडिने मेला हुनुपर्छ । त्यसैले आउँ सबै मिलेर यो महाधिवेशनलाई पारिवारिक जमघटको , नाता कुटुम्ब र आफन्त मिलनको उत्सव जस्तो बनाऔ, गुटगत अभिलाषा , अहंकार र संकीर्णता, स्वार्थ छाडेर देशका लागि , जनताका लागि , आफ्नो आदर्श सिद्धान्त , निष्ठा र सपनाका लागि पार्टी भित्र बृहत्तर एकता , मेलमिलाप , सदभावको वातावरण तयार पारौं , गौँडा कुरेर एकले अर्कोलाईलाइ पेल्ने, धकेल्ने, अँचेट्ने , निमोठ्ने मौकाको रुपमा होइन आपसमा सम्मान , स्वीकार , समन्वय , सहकार्य द्वारा सफलता सुनिश्चित गर्ने माइल स्टोन खडा गर्ने अवसरको रुपमा सदुपयोग गरौँ । गम्भीर बनौं , सबै सबै जिम्मेवार र इमानदार बनौं ।
(लेखक नेपाली कांग्रेस,संघीय मामिला तथा प्रदेश समन्वय बिभाग सदस्य हुन्)