हरि खरेल/दुलेगौडा । पछिल्लो समय नेपाल सरकारले २८ प्रतिशत भाडादर वृद्धि गरेको छ । वृद्धि भएको भाडा दुई वा सो भन्दा बढी प्रदेश भई संञ्चालन हुने सवारी साधनहरुमा मात्र लागु हुने कुरा प्रष्ट पारिएको छ । तर स्थानिय यातायातको हकमा भने सरकारले कुनै पनि निर्णय गरेको छैन् । तै पनि स्थानीय बस व्यवसायीहरुले सरकारले निर्णय गरेको छ, पेट्रोलको भाउ बढेको छ भन्दै यात्रुहरुसंग चर्काे भाडा असुलेका छन् ।
बिहिबार दमौलीबाट पोखरातर्फ जादै गरेको ग १ ख ४१३० नं को स्थानीय मिनीबसले पहिले भन्दा भाडा बढाएर लिएको यात्री इन्दिरा वि.सीले बताईन । सहचालकले “भाडा बढेछ, तेलको भाउ पनि महंगिएको छ भन्दै पैसा बढाएर माग्यो, हामी जस्तो सिधा साधा मान्छेलाई पनि होला झैँ लाग्यो, जति भन्यो त्यति नै ति¥यौ ।”उनले भनिन् । साथै उनले केहिदिन अघि पोखरा जाँदा एउटी महिलाले पुरानै दरको भाडा दिदाँ सहचालकले पुरा भाडा नदिएको भन्दै गाडीबाटै झराल्देको पनि सुनाइन् ।
यसै गरी दुलेगौडा बाट खैरेनिटार तर्फ जादै गरेको बसमा सवार एक वृद्धले बोल्न नसकेकाले सहचालकले हेप्ने गरेको बताईन । साथै आफु वृद्ध भएकाले भेरै बोल्यो भने पिटुछन् कि भनेर जति मागे त्यति दिनु परेको गुनासो गरिन ।
यसै गरी बिहिबार खैरेनीटारबाट भिमाद जाँदै गरेको ग १ ख ५२४७ नं को स्थानीय बस सबै यात्रुहरुले धेरै नै भाडा लिएको गुनासो गरे । सोही बसमा सवार पार्वती सुनारले दोभानदेखी भिमाद सम्म २० रुपैयाँको सट्टा तीस रुपैयाँ तिर्न बाध्य बनाईएको सुनाईन् । त्यस्तै भिमादकै बयोवृद्ध ध्रुब श्रेष्ठले भिमादबाट खैरेनीटार आउँदा ५० रुपैयाँ तिरेको बताए । सहचालकसंग भाडा कहिलेबाट बढ्यो भनेर सोध्दा लकडाउनपछि बढेको हो भनेर जवाफ दिने र झपाझप पैसा लिएको श्रेष्ठले सुनाए । स्थानीय बसहरुले यसरी भाडा बढाएर लिएपछि स्थानीय पत्रकार राजकुमार आले र हरि खरेलले यात्रु ठगिएकोबारे प्रहरीलाई जानकारी गराएपछि सवै यात्रुहरुको भाडा फिर्ता भयो ।
यता स्थानीय श्रृङ्गा यातायात व्यवसायी संघका अध्यक्ष केदार पौडेलले लिखित रुपमा नै भाडा बढाएको निर्णय नभएको सुनाए । उनले हामीसंगको टेलिफोन कुराकानीमा भने “त्यसरी भाडा लिएको छैन होला, हामीले कसैलाइए पनि लिखित रुपमा भाडा बढेको भनेर भनेका छैनौ । तपाईहरुलाई थाहा नै छ, यस क्षेत्रमा आउने कर्मचारीहरु कुन संस्कारबाट आएका छन्,त्यसैको प्रभाव हो । हामीले त धैर्य गर,अहिले बढाएर भाडा नलेऊ नै भनेका छौँ ।” अध्यक्ष पौडेलले संघ सरकारले भाडा बढाएपछि प्रदेश सरकारले पनि बढाई हाल्नुपर्नेमा प्रदेश सरकार आन्तरिक किचलोमा फस्दा व्यवसायीहरुलाई मर्कामा परेको र यात्रुहरुले पनि दुख भाग्नु पर्ने समस्या सिर्जना भएको बताए ।
यता भाडामा सर्वसाधरण जनता ठगिएको व्यापक गुनासो आएपनि प्रहरी भने माथिबाट कुनै निर्देशन र परिपत्र नआएको भन्दै कारबाही प्रक्रिया अगाडी बढाउन अलमल गरिरहेको छ । जिल्ला प्रहरी कार्यालय तनहुँका प्रहरी नायब उपरीक्षक युवराज तिमिल्सिनाले आफुहरुलाई भाडा बढेको र नबढेको भनेर कुनै पनि परिपत्र नआएकाले कारबाही प्रक्रिया अगाडी बढाउन समस्या भएको बताउँछन् ।
हेर्नुहोस यो भिडियो ।
