दुलेगौंडा । नेपाल आदिवासी जनजाति महासंघ नगर समन्वय परिषद् शुक्लागण्डकीले ३२औँ विश्व आदिवासी जनजाति दिवस सप्ताहव्यापी रूपमा भव्यताका साथ मनाउने भएको छ। परिषद्ले खैरेनीटारमा पत्रकार सम्मेलनको आयोजना गरी साउन १८ देखि २४ गतेसम्म सञ्चालन हुने सप्ताहव्यापी कार्यक्रमबारे विस्तृत जानकारी गराएको हो।
परिषद्का अध्यक्ष कुलकुमार कुमालका अनुसार मूल समारोह साउन २४ गते शुक्लागण्डकी नगरपालिकाको खुला मैदानमा आयोजना गरिनेछ।
• साउन १९ गते: एक्ले डाँडा क्षेत्रमा सरसफाइ तथा वृक्षारोपण
• साउन २० गते: आदिवासी जनजातिको भाषा, कला र संस्कृतिको महत्व शीर्षकमा वक्तृत्वकला प्रतियोगिता
• साउन २१ गते: बेलचौतारामा महिला तथा युवा लक्षित बृहत् अन्तरक्रिया
• साउन २२ गते: बेलचौतारामा जनप्रतिनिधिहरूसँग छलफल तथा अन्तरक्रिया
• साउन २३ गते: मूल समारोहको पूर्वतयारी बैठक
•साउन २४ गते : नगरपालिका परिसरमा मुल समारोह
पत्रकार सम्मेलनमा महासंघका सल्लाहकार संयोजक खिम कुमालले जनजाति समुदायको स्थापित अधिकारको रक्षा, प्राप्ति र अन्तर्राष्ट्रिय श्रम संगठन (ILO) ले सुनिश्चित गरेका अधिकारहरू पूर्ण रूपमा कार्यान्वयन गराउन सरकारलाई दबाब दिने उद्देश्यले यो दिवस मनाउन लागिएको स्पष्ट पारे ।
त्यस्तै, नेपाल आदिवासी जनजाति महासंघ गण्डकी प्रदेशका सचिव विमल भुजेलले मूल समारोहका दिन नगरभित्रका ९ वटा जातीय संगठनहरूको सांस्कृतिक झाँकी, कला-संस्कृति प्रदर्शन तथा मौलिक रैथाने खानाका परिकारहरूको प्रदर्शनी रहने जानकारी दिए ।
महासंघकी सचिव विर्षना श्रेष्ठले सञ्चालन गर्नुभएको उक्त पत्रकार सम्मेलनमा नगरभित्रका विभिन्न सञ्चारमाध्यममा आबद्ध पत्रकारहरूको उपस्थिति रहेको थियो।
