दुलेगौडा । शुक्लागण्डकी नगरपालिका वडा नं. ७ मा अवस्थित शुक्ला आधारभूत विद्यालयमा विशेष कक्षा सञ्चालन हुने भएको छ । शुक्लागण्डकी नगरपालिकाले बहुअपांगता भएका बालबालिकाहरुलाई शिक्षा प्रदान गर्ने उद्धेश्यले उक्त कक्षा सञ्चालनमा विगत देखिनै ल्याएको भएतापनि व्यवस्थित रुपमा सञ्चालनमा रहेको थिएन ।
आज सम्पन्न सर्वपक्षिय बैठकबाट विशेष कक्षालाई व्यवस्थित रुपमा सञ्चालन गर्ने निर्णय भएको विद्यालय व्यवस्थापन समितिका अध्यक्ष गुणाखर शमाले बताए । उनले भने “ संविधानले दिएको अधिकारलाई हामि सवै मिलेर यो श्रोत कक्षाका बालबालिकाको शिक्षा पाउने अधिकारलाई बञ्चित हुन दिनुहुदैन । सवै बालबालिकाले शिक्षा पाउने अधिकार छ । उक्त अधिकारलाई सुनिस्चित गराउन हामि लागिपरिरहेका छौँ । उनले भने ।
शुक्लागण्डकी नगरपालिका अपांगता समन्वय समितिका सदस्य एवम् अपांगता अधिकार कर्मी दामोदर रेग्मीले शिक्षाको पारिलो घामबाट कुनै पनि बालबालिका अपांगताको नाममा शिक्षाबाट बञ्चित हुन नहुने बताए । अपांगता अधिकार ऐन र अपांगता भएका व्यक्तिहरुको अधिकार सम्बन्धि महासन्धि –२००६ ले अपांगता भएका बालबालिकाहरुलाई उनिहरुको पायक पर्ने विद्यालयमा भर्ना भई पढ्ने अधिकार भएतापनि सामान्य बालबालिका सरह अध्ययन गर्न कठिनाई भएका बालबालिकाहरुका लागि सरकारले श्रोत केन्द्र मार्फत शिक्षा प्रदान गर्ने व्यवस्था अनुरुप यो श्रोत केन्द्र सञ्चालन गरिएको बताए । मस्तिष्क पक्षघात स्वावलम्बन समुह नेपालका तनहुँ संयोजक विष्णु गौतमले बालबालिकाको शारिरीक एवम् मानसिक अवस्था अनुसार सिकाई तथा हेरचाहको विधि फरक गर्नुपर्ने बताए । बाल हितकारी परियोजना नेपालका सहजकर्ता सञ्जु शाहिले बालबालिकाको अवस्था अनुसारको फिजीयोथेरापि सिकाउँदै उनिहरुको अवस्थालाई सुधार गर्नुपर्ने बताइन् । उपस्थित अभिभावकहरुले बालबालिकालाई विद्यालय सम्म र विद्यालयबाट घरसम्म सार्वजनिक सवारी साधनमा ल्याउनुपर्दा निकै कठिन भएको बताएका थिए भने विद्यालयमा आवश्यक खेल तथा फिजियो सामाग्रीहरुको अभाव भएको बताईको छ । विद्यालयमा आवश्यक सामाग्रीहरु विस्तारै व्यवस्थापन गर्दै जाने र सहयोगि संस्थाहरुसंग समन्वय गरी थप व्यवस्थित गर्ने विद्यालयका प्रधानाध्यापक लक्ष्मी अधिकारी पौडेलले बताईन् । विशेष श्रोेत केन्द्र आगामी आईतवार देखि नै पूर्ण रुपमा सवै बालबालिका विद्यालय आई नियमित सञ्चालन हुनेछ ।
