दुलेगौंडा । माध्यमिक शिक्षा परीक्षा एसइइमा शुक्लागण्डकी नगरपालिका भित्रकाे दुई विद्यालयकाे नतिजा निल रहेकाे छ ।
सरस्वती माध्यमिक विद्यालय थप्रेकबाट परिक्षामा सहभागी १९ जना र महेन्द्र माध्यमिक विद्यालय राइपुरबाट परीक्षामा सहभागी ५ जना सबै परीक्षामा अनुत्तीर्ण भएसंग यी दुई विद्यालयकाे नतिजा निल भएको हाे ।
नगरभित्रका यी विद्यालयमात्रै नभई अन्य विद्यालयकाे अवस्था पनि चिन्ताजनक रहेको छ । सामुदायिक विद्यालयबाट यस बर्षकाे एसइइ परीक्षामा ६६० जना सहभागी रहेका थिए । जस मध्य ३८९ अनुत्तीर्ण भएका छन् भने २७१ उत्तीर्ण भएका छन् । यसरी हेर्दा ४१ प्रतिशत विद्यार्थी उत्तीर्ण भएका छन् भने ५९ प्रतिशत विद्यार्थी अनुत्तीर्ण भएको देखिन्छ ।
यसैगरी संस्थागत विद्यालयतर्फ पनि नतिजा गत बर्षकाे तुलनामा निकै खस्केकाे छ । परीक्षामा सहभागी ३७४ विद्यार्थी मध्य २५३ विद्यार्थी उत्तीर्ण भएका छन् भने १२१ जना विद्यार्थी अनुत्तीर्ण भएका छन् । यसरी हर्दा संस्थागत विद्यालयतर्फ ६७.६४ प्रतिशत विद्यार्थी उत्तीर्ण भएको देखिन्छ भने ३२.३५ प्रतिशत अनुत्तीर्ण भएको देखिन्छ ।
समग्रमा शुक्लागण्डकीबाट ५०.६७ प्रतिशत विद्यार्थी उत्तीर्ण भएका छन् भने ४९.३२ प्रतिशत विद्यार्थी अनुत्तीर्ण भएका छन् । अधिकांश विद्यालयमा विद्यार्थीले गणित र विज्ञान विषयकाे परीक्षा बिगारेको पाईएकाे छ ।
शुक्लागण्डकी नगरपालिकाले शैक्षिक बर्ष २०८१ लाई बृहत् शैक्षिक गुणस्तर सुधार बर्षकाे रूपमा लिएर छ । चिन्ताजनक नतिजाको बिचमा नगरलाइ शैक्षिक गुणस्तर सुधार बर्ष सफल बनाउन थप चुनाैति देखा परेको छ ।
