बेलचौतारामा विद्युतको नोलाईट महशुल काउण्टरबाट सेवा सुरु

तनहुँ, २ कात्तिक– तनहुँ र नवलपुर जिल्लाका ग्राहकको सहजताको लागी नेपाल विद्युत्त प्राधिकरण लेखनाथ वितरण केन्द्रले खैरेनीटार सवस्टेशनमा नोलाईट तथा महशुल काउण्टर सञ्चालनमा ल्याएको छ । बेलचौतारास्थित खैरेनीटार शव स्टेशनसंगै निर्माण गरिएको भवनबाट सोमबार सेवा सुभारम्भ गरिएको हो । पहिलो सेवाग्राही जनकल्याण मावी बेलचौतारले विद्युत्तको महशुल बुझाएर सेवा सुभारम्भ गरियो ।
सेवा शुभारम्भको अवसरमा बोल्दै नेपाल विद्युत प्राधिकरण गण्डकी प्रादेशिक कार्यलयका प्रखुम टेकनाथ तिवारीले वितरण केन्द्रले दिने सबै सेवा ग्राहकलाई उपलब्ध गराउने बताए । उनका अनुसार हाल महशुल काउण्टर र नो लाईटको सेवा दिइएको छ । ‘नयाँ ग्राहक सेवा, मर्मतसम्भार, शिकायतको सेवा पनि थप हुनेछ’, उनले भने ।
गाँस, वास, कपाससंगै वर्तमान समयमा बिजुलीबत्ती पनि आधारभूत आवश्यकतामा पर्न थालेकाले ग्राहकसंगको सहकार्यमा सेवा विस्तार र थप गर्दै लैजाने तिवारीको भनाई छ । पर्याप्त जग्गा भएकाले यस ठाउँमा प्रदेशस्तरको ट्रान्सफर्मर वर्कसप राख्ने योजना उनले सुनाए ।
शुक्लागण्डकी नगरपालिका–५ का अध्यक्ष दिर्घबहादुर थापाले सेवा विस्तारका लागी सहयोग रहने प्रतिबद्धता जनाए । उनले शवस्टेशन सञ्चालनमा आएपछि पनि निरन्तर बत्ती जाने समस्या भएकाले सुधार गर्न सुझाव दिएका छन् ।
प्राधिकरणले यहाँबाट सेवा दिन थालेपछि तनहुँ र नवलपुरका उपभोक्ताले पोखराको लेखनाथसम्म पुग्नुपर्ने बाध्यताको अन्त्य भएको छ । ‘नयाँ मिटर लिनलाई दिन बिताएरै लेखनाथ जानु परेन । यतिबेला त झन कोरोनाको डरले त्यहाँसम्म पुग्न पनि मुस्किल थियो’, खैरेनीटारका बुद्धीबहादुर थापाले भने, ‘अब धेरै सजिलो हुने भयो ।’ तनहुँको शुक्लागण्डकी नगरपालिका, भिमाद नगरपालिका, म्याग्दे गाउँपालिका, ऋषिङ गाउँपालिका, घिरिङ गाउँपालिका र नवलपुरको बौदीकाली गाउँपालिका र बुलिङटार गाउँपालिकाका झन्डै २५ हजार सेवाग्राहीले यहाँबाट सेवा पाउनेछन् । विभिन्न स्थानमा महशुल काउण्टर भएपनि नयाँ मिटर जडान, उजुरी लगायत सेवाका लागी भने लेखनाथ नै जानुपर्ने बाध्यता थियो ।
उक्त स्थानमा गत बर्षको पुषदेखी ३३ केभी प्रसारण लाइन क्षमताको शवस्टेशन सञ्चालनमा आएको छ । प्रसारण लाइनको क्षमता बढेपछि उद्योग कलकारखाना सञ्चानमा सघाउ पुगेपनि पुर्ण क्षमता नचल्दा बेला न कुबेला झ्याप्प–झ्याप्प लाइन जाने समस्याले भने उपभोक्ताले हैरानी खेप्नुपरेको छ ।