दुलेगौंडा । फाल्गुन २१ गतेको निर्वाचनको मिति नजिकिदै गर्दा रास्वपा तनहुँ क्षेत्रनम्बर २ बाट उम्मेद्वार बन्न आकांक्षीहरु देखिन थालेको छ । हालसम्म रास्वपाबाट तनहुँ क्षेत्रनम्बर २ बाट शंकर पन्त, मनराज गुरुङ, श्रीराम न्यौपाने, सुन्दर बस्याल, राजेश पाण्डेले उम्मेद्वार बन्न आकांक्षा व्यक्त गरेका छन् ।
शंकर पन्त
राष्ट्रिय स्वतन्त्र पार्टीको स्थापना सँगै पार्टीसँग जोडीएका शंकर पन्त रास्वपा गण्डकीका प्रवक्ता हुन् । गायकको पृष्ठभूमिका पन्त विगतमा माओवादीका नेताको रुपमा पनि सक्रिय रहेका थिए । पार्टीको नीति, विधि र सिद्धन्त अनुरुप पार्टी अगाडि बढ्न नसकेको भन्दै पार्टीभित्रै विद्रोह गरेर रास्वपामा जोडिएका थिए । अहिले रास्वपाका कार्यक्रममा सक्रिय रुपमा अगाडि बढेका छन् ।
मनराज गुरुङ
उज्यालो नेपाल रास्वपामा समायोजन भएसंगैं मनराज गुरुङ यतिबेला तनहुँ क्षेत्रनम्बर २ बाट प्रत्यक्ष निर्वाचनमा सहभागि हुने आकांक्षा व्यक्त गरेका छन् । उज्यालो नेपाल पार्टीमा हुदाँ गुरुङ गण्डकी प्रदेशका संयोजक बनेका थिए । गुरुङ विसं. २०७४ को निर्वाचनमा माओवादी चुनाव चिह्न लिएर शुक्लागण्डकी नगरपालिका वडा नम्बर १२ को वडाध्यक्षमा निर्वाचित भएका थिए । माओवादी नेकपा समाजवादीसहितको गठबन्धन गरी नेपाली कम्युनिष्ट पार्टीमा रुपान्तरण भएपछि गुरुङ उज्यालो नेपालमा जोडिएका थिए ।
इ.श्रीराम न्यौपाने
स्वपाका केन्द्रीय उर्जा विभागका प्रमुख इन्जिनियर श्रीराम न्यौपाने तनहुँ क्षेत्रनम्बर २ मा सक्रिय बनिरहेका छन् । उर्जा क्षेत्रमा विशेष दखलता भएका न्यौपानेले सिक्लेसमा अन्डरग्राउण्ड हाइड्रोपावरको कार्य गरिरहेका छन् । यसअघि नागढुङ्गा सुरुङ मार्गमा सुरुङ निर्माण संयोजक बनेर काम गरेका थिए । उनी उर्जा क्षेत्रबाट देशको विकास सम्भव छ भन्दै स्वपाबाट राजनितिमा उदायका छन् ।
सुन्दर बस्याल
रास्वपा तनहुँ क्षेत्रनम्बर २ का सभापति समेत रहेका सुन्दर बस्याल पनि प्रत्यक्ष निर्वाचनमा सहभागि हुने आकांक्षा व्यक्त गरेका छन् । नसिडिए तनहुँका वरिष्ठ उपाध्यक्ष, लायन्स क्लबका अग्रणी लायन्स लिडर, तथा स्वास्थ्य क्षेत्रमा २० वर्षभन्दा बढी समर्पित बस्याल सामाजिक संघ–संस्था र स्वास्थ्यसँग सम्बन्धित अभियानहरूमा सक्रिय रहँदै आएका छन्।
राजेश पाण्डे
रास्वपाका शुक्लागण्डकी नगर कमिटीका सचिव समेत रहेका राजेश पाण्डे पनि यतिबेला तनहुँ क्षेत्रनम्बर २ बाट प्रत्यक्ष निर्वाचनमा सहभागि हुन आकांक्षा व्यक्त गरेका छन् । सन् २०१५ मा स्टुडेन्ट अफ दि यिएर, सन् २०१६ मा मिस्टर नोवल, एमबिए अध्ययनको क्रममा मिस्टर भर्सटाइल जस्ता उपाधि हासिल गरिसकेका छन् । उनी राजनीति र समाजसेवालाई फरक फरक रुपमा हेर्दै सामाजिका कार्यमा सक्रिय रहेका छन् । यतिबेला शुक्लागण्डकी नगरपालिका भित्र रास्वपाको संगठन विस्तार कार्यमा सक्रिय छन् ।
