भिमाद । तनहुँको भिमाद नगरपालिकामा मंसिर ७ गते अर्थात हरिबोधनी एकादसीको दिनदेखि १३ गतेसम्म भिमाद रंगशालामा राष्ट्रिय स्तरको फुटबल प्रतियोगिता हुदै छ । युवा क्लब भिमादले चौथो संस्करणको भिमाद अर्ना कप ‘११ ए साइड’ फुटबल प्रतियोगिता आयोजना गरेको हो ।
एउटै मैदानमा स्थानीय स्तरका खेलाडीले अन्तराष्ट्रिय स्तरका खेलाडीसंग प्रतिस्पर्धा गर्न पाउने क्लबका सचिव सुनिल श्रेष्ठले बताए । साथै फुटबल खेलको माध्यमबाट भिमाद बजारलाई देश तथा विदेशमा चिनाउने, आन्तरिक पर्यटक भित्र्याउने र युवापुस्तालाई खेलप्रति आकर्षित गर्ने मुख्य उद्धेश्य राखिएको श्रेष्ठको भनाई छ ।
प्रतियोगिताका संयोजक ज्ञानेन्द्र गुरुङका अनुसार प्रतियोगितामा नेपालका ए तथा बी डिभिजन क्लब पनि आउने छन् । साथै प्रत्येक टिमले ५ जनासम्म विदेशी खेलाडी समावेश गर्न गुरुङले बताए ।
क्लबका अध्यक्ष ज्ञानबहादुर थापाले वि.सं २०७१ सालदेखि सुरु गरिएको भिमाद कप तेस्रो संरकरणसम्म आयोजना गरेको भएपनि त्यसपछि विविध कारणले प्रतियोगिता हुन नसकेको अवस्थामा अब प्रतियोगिताले निरन्तरता पाउने बताए । उनले यति ब्रुअरी लिमिटेडसंग सम्झौता गरेर अहिले आर्थिक मन्दीमा पनि खेल खेलाउन लागिएको भन्दै स्थानीय पालिका, उद्योगी व्यवसायी र देशविदेशमा रहेका शुभचिन्तकहरुको सहयोग र हौसलाले प्रतियोगिता गर्न लागिएको उनको भनाई थियो ।
प्रतियोगिताको विजेताले नगद २ लाख २२ हजार २२२ र उपविजेता टिमले १ लाख ११ हजार १११ साथमा ट्रफि, मेडल र प्रमाण पत्र प्राप्त गर्नेछ । व्यक्तिगत विद्यातर्फ प्रतियोगिताको सर्वोत्कृष्ट खेलाडीले १० हजार , ट्रफि र प्रमाण पत्र पाउनेछ भने सर्वाधिक गोलकर्ता, उत्कृष्ट गोलरक्षक, फरवार्ड, मिडफिल्डर र डिफेन्डरले जनही नगद ५ हजारसहित ट्रफि र प्रमाणपत्र हात पार्नेछ ।
खेल हेर्न दर्शकलाई निस्शुल्क व्यवस्था मिलाइएको छ भने टिम दर्ता शुल्क १० हजार तोकिएको छ । प्रतियोगिताको संरक्षकमा भिमाद नगरपालिका र प्रायोजकमा यति ब्रुअरी रहेको छ ।
