दुलेगौंडा । जिपि कोईराला राष्ट्रिय श्वासप्रश्वास उपचार केन्द्र, बेलचौतारामा विशेषज्ञ डाक्टरबाट श्वासप्रश्वास सम्बन्धी उपचार सेवा प्रारम्भ भएको छ ।
नेपाली राजनीतिका शिखरपुरुष तथा पूर्व प्रधानमन्त्री स्वर्गिय गिरीजाप्रसाद कोइरालाको तेह्रौँ स्मृति दिवसको अवसर पारेर विशेषज्ञ डाक्टरबाट श्वासप्रश्वास सम्बन्धी उपचार सेवा प्रारम्भ गरिएको हो । मंगलबार बोडका सदस्य शेषमणि आचार्यको श्वासप्रश्वासको परिक्षण गरी सेवाको शुभारम्भ गरिएको केन्द्रका कार्यकारी निर्देशक राम कुमार श्रेष्ठले बताए ।
श्रेष्ठका अनुसार अस्पतालमा श्वास प्रश्वास विशेषज्ञ चिकित्सक डा.शैलेश गुरुङद्धारा विरामीको उपचार गरिने भएको छ । जर्नल मेडिसिन लगायतका सेवा प्रदान गर्दै आइरहेको अस्पतालले १२ बर्षपछि श्वासप्रश्वास विशेषज्ञ डाक्टर शैलेश गुरुङको नेतृत्वमा सेवा सुरु गरेको हो ।
