दुलेगौँडा । शुक्लागण्डकी महोत्सवमा आयोजित गण्डकी प्रदेश अन्तरपालिका स्तरीय भलिवल प्रतियोगितामा विरुवा गाउँपालिका स्याङ्जा च्याम्पियन बनेको छ । मंगलबार भएको फाइनल खेलमा शुक्लागण्डकी नगरपालिकालाई ३–१ को सेटमा पराजित गर्दै विरुवाले रु. २ लाख पुरस्कार हात पारेको हो ।
विरुवाले पहिलो सेट २७–२५ ले जितेको थियो भने दोस्रो सेट शुक्लागण्डकीले २५–१७ ले जित्दै १÷१ सेटको बराबरी गराएको थियो । तेस्रो सेट २५–२३ ले जितेको विरुवाले चौथो सेट पनि २५–१७ ले पराजित गर्दै उपाधि जितेको हो । उपविजेता बनेको शुक्लागण्डकी नगरपालिकाले रु. १ लाख पुरस्कारसहित ट्रफि, मेडल र प्रमाण पत्र पायो ।
त्यस्तै, तेस्रो स्थानमा लागि पुतली बजार नगरपालिका स्याङ्जा र हरिनास गाउँपालिकाबीच भएको खेलमा ३–१ को सेटमा जित हाँसिल गर्दै पुतलीबजार तेस्रो बन्यो । पुतलीबजारले २५–१४, २५–४, २२–२५ र २५–२० को सेटमा हरिनासलाई हराएको होे । तेस्रो भएको पुतलीबजारले रु. ५० हजार र सान्त्वना भएको हरिनासले रु. २५ हजारसहित ट्रफि, मेडल र प्रमाणपत्र प्राप्त गरेका छन् । प्रतियोगितामा विरुवाका संजोक परियार सर्वोत्कृष्ट खेलाडी घोषित भए ।
त्यस्तै, वेष्ट ब्लकरमा पुतलीबजारका लेशन गुरुङ, सर्भरमा पुतलीबजारकै सञ्जु विक्रम शाह, सेटरमा विरुवाका मिलन राना, स्पाइकरमा शुक्लागण्डकीका इश्वर सुनार, डिफेण्डरमा विरुवाका जित गुरुङ पुरस्कृत भए । त्यस्तै, विरुवाका प्रशिक्षक गणेश गुरुङ उत्कृष्ट प्रशिक्षक घोषित भए । प्रतियोगितामा प्रदेशभित्रका १३ पालिकाले सहभागीता जनाएको खेल संयोजक अर्जुन घिमिरेले जानकारी दिए ।
