दुलेगांडा । शुक्ला हिलेटार शिवालय मन्दिर व्यवस्थापन समितिको अध्यक्षमा पर्शुराम शर्मा भण्डारी चयन भएका छन् । शनिबार भएको प्रथम साधारण सभा तथा अधिवेशनले भण्डारीको अध्यक्षमा ११ सदस्यीय कार्यसमिति चयन गरेको हो ।
समितिको उपाध्यक्षमा डिलबहादुर श्रेष्ठ र दिपक क्षेत्री, सचिवमा कमल भट्टराई, सह–सचिवमा दलबहादुर क्षेत्री, कोषध्यक्षमा हरि खड्का चयन भएका छन् । यसैगरि सदस्यमा कमला कुमारी पौडेल भट्टराई, बोधराज गैह्रे, विज्ञान भण्डारी, रमेश महत चयन भएका छन् ।
कार्यक्रममा बोल्दै गण्डकी प्रदेशका आर्थिक मामिला मन्त्री जीतप्रकाश आलेले जनप्रतिनिधिहरु जनताप्रति समर्पित हुन नसकेको बताए । उनले जनप्रतिनिधिहरु कुनै पार्टीको प्रतिनिधि, नातेदारको प्रतिनिधि, कुनै एउटा क्षेत्रको प्रतिनिधिजस्तो मात्रै देखिएको हुदाँ जनताहरु जनप्रतिनिधिप्रति असन्तुष्ट रहेको बताए । तर, आफुले भने कुनै पार्टी, जाति र भुगोल नभनि प्राथमिकताको आधारमा बजेट विनियोजन गरेको दाबी गरे । ६ महिनामा नै तदर्थ समितिले मन्दिर क्षेत्रको विकासमा उत्कृष्ट काम गरेको भन्दै प्रशंसा गरे ।
शुक्लागण्डकी नगरपालिकाका मेयर कृष्णराज पण्डितले धार्मिक क्षेत्र विश्वासको केन्द्र भएकाले शुक्ला हिलेटार शिवालय क्षेत्रको विकासमा कुन कुञ्जुस्याइँ गर्न नहुने बताए । उनले नगरको तर्फबाट मन्दिर परिसरमा क्रियापुत्रि भवन निर्माणका लागि ७० लाख रुपैयां बजेट व्यवस्था गरेको जानकारी गराए ।
यसैगरि उपप्रमुख खुमबहादुर विक राजुले सनातन धर्म नभई सभ्यता रहेको बताए । धर्ममा सबै जातजाति वर्ग, समुदायको मानिस नअट्ने तर सभ्यतामा सबै अट्न सक्ने उनको तर्क थियो । साथै उनले संस्कृतिक क्षेत्रको विकासमा लागि संरचना निर्माणमा मात्रै केन्द्रित हुन नहुने बताउदै आध्यात्मिक साधनाको केन्द्र बनाउन तर्फ ध्यान समितिलाई सुझाव दिए ।
त्यसैगरि वडा नम्बर ८ का वडाध्यक्ष नारायण सिं थापाले देशको समृद्धिको लागि धर्म संस्कृतिको संरक्षण गर्नुपर्नेमा जोड दिए । मन्दिरको डिपिआर अनुसार सबै मिलेर निर्माण कार्य पुरा गर्नुपर्ने बताए ।
प्रथम अधिवेशनबाट अध्यक्षमा चयन भएका पर्शुराम भण्डारीले आगामि दिनमा समितिले शिवालय क्षेत्र परिसरमा कम्पाउण्ड गर्ने, महादेवको साकार स्वरुप १०८ शिवलिङ्ग स्थापना गर्ने, गंगा स्नान धाराको व्यवस्था गर्ने, आकस्मित प्राकृतिक घटनालाई ख्याल गरि ढल निकास गर्ने, वेद विद्याश्रम सहितको शैक्षिक गतिविधि गर्ने लगायतका कार्य गर्ने बताए । साथै केहि समयपछि महायज्ञ संञ्चालन गरि महायज्ञबाट संकलित दान रकमले आवश्यक संरचना निर्माण गर्ने बताए ।
