दुलेगौंडा । शुक्लागण्डकी नगरपालिकाकाे कार्यक्षेत्रमा रहेको सहकारी संस्थाबिच अन्तरक्रिया कार्यक्रम सम्पन्न भएको छ । पछिल्लो समय सहकारी संस्था समस्या ग्रस्त बन्दै जान थालेको समाचार बाहिरिन थालेपछि नगरपालिकाले सहकारी संस्थाबिच अन्तरक्रिया कार्यक्रम आयाेजना गरेको हाे ।
शुक्लागण्डकी नगरपालिकाका मेयर कृष्णराज पण्डितले पछिल्लो समय सहकारी संस्थाहरू भित्रभित्रै समस्याग्रस्त अवस्थामा रहेको हुदाँ सहकारी सञ्चालकलाई सजक बनाउन अन्तरक्रिया कार्यक्रम गरिएको बताए । सहकारीले उत्पादनशिल क्षेत्रमा ऋण लगानी गर्न नसक्दा सहकारी घाटामा गईरहेकाे बताउदै उत्पादनशील क्षेत्रकाे पहिचान गरि लगानी गर्न आग्रह गरे । आम नागरिकको बचत सुरक्षित गराउनुका साथै नगरपालिका र सहकारी विच समन्वय स्थापन गराउनका निम्ति अन्तरक्रिया कार्यक्रम गरिएको उनकाे भनाइ छ ।
कार्यक्रममा पाेखरा राेयल बचत तथा ऋण सहकारी संस्थाका कार्यकारी अधिकृत भिम गुरूङले प्रशिक्षण गराएका थिए । उनले पछिल्लाे समय सहकारी संस्थामा देखिएका समस्या, चुनाैति र समस्याको समस्याको समाधानको विषयमा प्रष्ट पारेका थिए । कार्यक्रममा नगरपालिकाका उपप्रमुख खुमबहादुर विक राजु, शुक्लागण्डकी-७ का वडाध्यक्ष खड्क सिं थापा, कृषि शाखा प्रमुख नवराज पण्डित, जिल्ला सहकारी संघ तनहुका लेखा संयाेजक हरि खड्का लगायतले बाेलेका थिए ।
शुक्लागण्डकी नगरपालिकामा हालसम्म ५२ वटा सहकारी संस्था दर्ता भएका छन् भने सक्रिय रूपमा ४० वटा सहकारी मात्रै सञ्चालनमा रहेकाे छ । नगरभित्रका सहकारीहरूले ६ अर्ब ४१ कराेड ऋण लगान गरेकाे छ भने २६२ जनाले राेजगारी पाएका छन् ।
