चाडपर्वको मुखमा मूल्यवृद्धि, उपभोक्ता मारमा

दुलेगौंडा । नेपालीहरुको मुख्य पर्व दशैँ, तिहार, छठ नजिकिदै गर्दा बजारमा अस्वाभाविक रुपमा मूल्यवृद्धि भइरहेको छ । यसले गर्दा उपभोक्ता प्रत्यक्ष मारमा परेका छन् । नेपाल आयल निगमले शनिबार प्रेश विज्ञप्ती जारी गर्दै खाना पकाउने ग्यास, पेट्रोल, मट्टीतेल र हवाई इन्धनको भाउ बढेको थियो ।

चाडपर्वको मुखमा भएको मूल्यवृद्धिले समग्र मुख्य चाडपर्व रमाईलो नहुने ढोरफिर्दीका बोधराज शर्माले बताए । ‘‘चाडपर्वको मुखैमा मूल्य वृद्धि हुनु राम्रो हैन् । सरकारले अब दीर्घकालीन सोच नबनाउने हो भने चाडपर्व आउला जाला तर जुन खुसी आउनपर्ने हो त्यो चाही आउदैन’ उनले भने ।

एकातिर व्यापार व्यवसाय नहुनु र अर्काेतिर एकाएक मूल्य वृद्धि हुदाँ चाडपर्व आए जस्तै नभएको हलेदीकी विमला राईले बताईन । ‘देशको स्थिती यस्तो छ । अलिकति घटाए जस्तो गरेर ह्वात्तै मूल्य वृद्धि गर्छ । यस्तै हो भने चाडपर्व मनाउन पनि गाह्रो हुन्छ’ उनले भनिन ।

महँगीले बिहान बेलुका छाक टार्नै वर्गलाई मुस्किल हुन थालेको छ । महँगी यसरी बढिरहे पनि सरकार मौन छ । बजारमा भइरहेको कालोबजारी र कृत्रिम अभाव हटाउन सरकारले पहल नगरेको नागरिकको गुनासो रहेको छ ।

गएरातीदेखि ग्यास प्रतिसिलिण्डर २ हजार १ सय १० रुपैयाँ पुगेको छ । यस्तै, पेट्रोल लिटरमा दुई रूपैयाँ, डिजल र मट्टीतेलमा ६ रूपैयाँ तथा हवाई इन्धनमा प्रतिलिटर ८ रुपैयाँ बढेको छ ।