दुलेगौँडा । शुक्लागण्डकी नगरपालिका–८ मा रहेको एक्ले डाँडाको विकासका लागि पर्यटकिय विकास समिति गठन गरिएको छ । मंगलबार वडा कार्यालयमा भएको वडावासी तथा सरोकारवालाहरुको भेलाले ११ सदस्यीय पर्यटन विकास समिति गठन गरिएको हो ।
समितिको अध्यक्षमा विपिन्द्र सेन ठकुरी सर्वसम्मत चयन भएका छन । उपाध्यक्षमा मिलन महत, सचिवमा बिष्णुबहादुर अधिकारी, कोषाध्यक्षमा सम्झना कोइराला चयन भए । त्यस्तै, सदस्यहरुमा कोपिला महत, रोमबहादुर सि ठकुरी, कल्पना अधिकारी, डम्वरबहादुर खाण, शिवबहादुर अधिकारी चयन भएका छन् । दुई जना पदेन सदस्यहरुमा सफल एक्ले टोलका अध्यक्ष लक्ष्मण अधिकारी र वडा अध्यक्ष वा वडा अध्यक्षले तोकेको एक जना वडा सदस्य पछि तोक्ने गरी ११ समितिको तदर्थ समिति चयन भएको हो ।
भेलामा शुक्लागण्डकी–८ का वडा अध्यक्ष नारायण सिं थापा, पुर्व वडाध्यक्ष कृष्णप्रसाद रेग्मी, समाजसेवी दिपक क्षेत्री लगायतले एक्लेडाँडाको विकासमा भएको काम, सम्भावना र चुनौतीका विषयमा बोलेका थिए । वडाध्यक्ष थापाले विकासको काममा आफुले व्यक्ति र पार्टी कहिले पनि नहेर्ने बताउँदै विकासका नाउमा कुनै सम्झैता नहुने बताएका थिए । एक्ले डाँडालार्इ वडाको गौरवको आयोजनाको रुपमा विकास गरी अघि लैजानको लागी आफुले सक्दो पहल गर्ने प्रतिवद्धता जनाए ।
पुर्व वडाध्यक्ष कृष्णप्रसाद रेग्मीले आफ्नो पालामा सुरु गरेको वडाको गौरवको आयोजनाले निरन्तरता पाएकोमा खुसी व्यक्त गरे । यसको सुरुवाती चरण, डीपीआर तयार गर्दा लिएको लक्ष्य, हालसम्मको प्रगतिकोबारेमा प्रकाश पारेका थिए ।नवनिर्वाचित समितिका अध्यक्ष ठकुरीले आम-भेलाबाट आफुले पाएको जिम्मेवारी बहन गर्दा एक्लेको विकास निर्माणको काममा कम्मर कसेर लाग्ने प्रतिवद्धता जनाउँदै यसमा सबैको सहयोगको अपेक्षा समेत राखे ।
२०७४ सालसम्म पहिचान समेत नरहेको एक्लेडाँडा स्थानीय निर्वाचनमा वडाध्यक्षमा कृष्णप्रसाद रेग्मी र उनको नेतृत्वको टिम आएपछि गरेको प्रचारप्रसारले यो डाँडाले पर्यटक आकर्षित गर्न थालेको हो । पुर्व जनप्रतिनिधिहरुले देखेको सपना अनुसार केही संरचनाहरु निर्माण हुदाँ मात्रै पनि दिनहुँ सयका हाराहारीमा पर्यटक घुम्न आउने गरेको सफल एक्ले टोलका अध्यक्ष लक्ष्मण अधिकारीले बताए । उनले डिपिआर अनुसार योजनालाई छिट्टै पुर्णता दिन पनि आग्रह गरेका थिए ।
