दुलेगौंडा । तनहुँको शुक्लागण्डकी–७, दोभान टोलस्थित चिहानडाँडाका खर्कबहादुर गुरुङको जीवन कहाली लाग्दो छ । उमेरले ४० हिड्दै गरेका गुरुङ प्यारालाइसिस रोगबाट थलिएको पाँच बर्ष पुग्यो । हिडडुल गर्नै मुस्किल गुरुङलाई अर्को दशा आइहालेको छ । हालै उनको दुवै मृगौलाले काम नगर्ने भएको छ । गुरुङ विभिन्न रोगबाट गुज्रिनु परेको छ । उनी दिनदिनै कमजोर बन्दै गएका छन् । घरमुली नै थला परेपछि उनको परिवारमा विहान बेलुकाको चुलो बल्न धौे छ । दुवै मृगौला फेल भएपछि गुरुङले हप्तामा दुई पटक डायलोसिस गराउँदै आएका छन् । उनी भन्छन्–‘सास भइँञ्जेल बाँच्ने आस हुदो रहेछ । के के उपचार गर्ने हो, पैसाको जो हो कसरी गर्ने, साह्रै गाह्रो छ ।’
दुई छोरी र एक छोराको अभिभावक गुरुङ नै घरको मुल खम्बा भएको र अन्य आय श्रोत नभएकाले आर्थिक अवस्था अत्यन्त कमजोर रहेको वडाध्यक्ष खड्क सिं थापा मगरले जानकारी दिए । उनले गुरुङ परिवारको दयनीय अवस्था भएकाले मनकारी व्यक्ति तथा संघ संस्थाहरुलाई सकेको सहयोग गर्न आग्रह गरे । गुरुङको उपचारका लागि सहयोग होस् भन्ने उद्धेश्यले शुक्लागण्डकी–७ स्थित प्रथम शहीद लखन थापा मगर लाङघाली मगर समाजले आर्थिक सहयोग गरेको छ । समाजले विरामी गुरुङलाई नगद १० हजार रुपैयाँ सहयोग उपलब्ध गराएको हो ।
उनको अवस्था कमजोर हुदै गएकाले सहयोगको अभियान समाजबाट सुरु गरिएको स्थानीय मनबहादुर पुनले जानकारी दिए । आफ्नो आर्थिक अवस्था कमजोर भएकाले सवैले सकेको सहयोग गर्न विरामी गुरुङले अपिल गरेका छन् । गुरुङलाई सहयोग गर्न चाहानेले कुमारी बैँकमा रहको धनबहादुर गुरुङको खाता नं २८५०२८०६१०१०००१ मा पैसा जम्मा गर्न सकिनेछ । विरामीबारे जानकारी लिन ९८१९१५४२७६ मा सम्पर्क गर्न सकिनेछ ।
