दुलेगौंडा । तनहुँ भिमाद ६ थुम्कीडाडाँ स्थित विश्व शान्ति बौद्ध बिहार बन्ने भएको छ । विश्वशान्ति बौद्ध बिहार समितिले बौद्ध बिहारसंगै शान्ति स्तुपा निर्माण गर्न लागिएको हो । विश्व शान्ति बौद्ध बिहार भिमादको आयोजनामा थुम्कीडाडाँमा २५६७ औं बुद्ध जन्मजयन्तीको अवसरमा भगवान गौतम बुद्धको पूजा आराधना समेत गरेको छ ।
बुद्ध जन्मजयन्तीको अवसरमा गण्डकी प्रदेश सभा सदस्य एव्म कांग्रेस तनहुँका सभापति जीतप्रकाश आलेले थुम्कीडाडाँमा शान्ति स्तुपा निर्माण स्थलमा शान्ति झण्डा झाण्डोन्त्तोलन गरे । सोही अवसरमा सांसद आलेले थुम्कीडाडाँको निर्माण गर्न लागिएको विश्व शान्ति बौद्ध बिहार र शान्ति स्टुपा निर्माणका लागि बजेटको पहल गर्ने बताए । बौद्ध बिहारसंगै विश्व शान्ति स्तुपा लगायतका संरचना निर्माण सबै मिलेर गर्ने हो, उनले भने, आफु जनप्रतिनिधि भएकाले यसको निर्माणमा मैले सक्दो सहयोग गर्छु । विश्वशान्ति बौद्ध बिहार निर्माण सम्पन्न गर्न सके धार्मिक पर्यटकीय स्थलको विकास हुन्छ, सांसद आलेले भने । बौद्ध बिहार र शान्ति स्तुपाले विश्वभरबाट पर्यटक तान्न सक्छ ।
भिमादलाई धार्मिक पर्यटकीय गन्तव्य स्थलको विकास गर्ने उदेश्यले बौद्ध बिहार निर्माण गर्न लागिएको विश्वशान्ति बौद्ध बिहार भिमादका अध्यक्ष डा.देवबहादुर थापाले बताए ।थुम्कीडाडाँमा करिब २० रोपनी क्षेत्रमा बौद्ध बिहार, विश्वशान्ति स्तुपा,विपश्यना ध्यान केन्द, बगैँचा, पदमार्ग, बौद्ध धर्म दर्शन तथा परियत्ति शिक्षा अध्ययन पुस्ताकलय,भगवान बुद्धको जीवनी तथा दर्शनसंग सम्बन्धीत श्रव्यदृश्य केन्द्र, धम्म देशना हल लगायतका संरचना निर्माणको गुरुयोजना बनाएको उनले बताए । यी सबै पूर्वधार निर्माण गर्न करिब १५ करोड रुपैयाँ लाग्ने अनुमान छ ।
बौद्ध बिहार निर्माणका लागि गुरुयोजना बनाएको छौ, उनले भने, तर, पूर्वधार निर्माणका लागि कहीकतैबाट बजेट बिनियोजन भएको छैन । यसको लागि स्थानीय, प्रदेश र संघीय सरकारसंग बजेटको माग गर्छु, उनले भने । भिमाद नगरपालिकाको बजेटमा बिहार स्थल सम्म सडक ट्रयाक र सिँढी बाटो निर्माण भएको छ । तर, अन्य पूर्वधार निर्माणका लागि बजेट छैन । कतिपय संरचना दानबाट भइरहेको छ ।
थुम्कीडाडाँमा बुद्ध जयन्ती दिन बर्षेनी पूजा आराधान गर्दै आइरेको विश्वशान्ति बौद्ध बिहारका सचिव तथा वपा रिबहादुर रानाले बताए ।बौद्ध बिहार बने देखि धर्मलम्बीहरुलाई पूजा आराधाना तथा ध्यान गर्न व्यवस्थित हुने थियो ।
थुम्कीडाडाँमा सडक, सिँढी निर्माण भएदेखि दिनहुँ मान्छे पुग्ने गरेको विश्वशान्ति बौद्ध बिहार भिमादका उपाध्यक्ष क्याप्टेन खड्क बहादुर थापाले बताए । विश्वशान्ति बौद्ध बिहार समयमा निर्माण गर्ने सके आन्तरिक पर्यटकको भीड लाग्ने थियो ।
भिमाद वडा नम्बर ६ का वडा अध्यक्ष श्यामसुन्दर जोशीले थुम्कीडाडाँमा बौद्ध बिहार बनाउने भने देखि धेरै थोरै लगतार नगरपालिकाबाट बजेट बिनियोजन भएको छ । उक्त बजेटले सडक ट्रयाक, सिँढी निर्माण लगायतका संरचनामा निर्माण गरेको छ । बौद्ध बिहार लगायतको संरचना गर्न स्थानीय, प्रदेश र संघीय सरकारले बजेट व्यवस्था गरे पूर्वधार तयार हुन समय लाग्दैन ।
