तनहुँ । आज शहीद दिवस । हरेक बर्ष माघ १० देखि १६ गते सम्मको समयावधिलाई सहिद सप्ताहा भनि विविध कार्यक्रम गरी शहीदको सम्झना गरिन्छ । माघ १६ गते विशेष कार्यक्रम विच यो दिवस मनाईन्छ ।
देश र नागरिकको मुक्तिका लागि जीवन बलिदान गर्ने शहीदहरुको सम्झनामा काठमाण्डौको शहीदगेटमा शहीद गंगालाल श्रेष्ठ, शुक्रराज शास्त्री, धर्मभक्त माथेमा र दशरथ चन्दको शालिकमा माल्यार्पण गरिन्छ । तनहुँको पुलिम¥र्याङ्गलाई शहिद गाउँ भनेर पनि चिनिन्छ । उक्त ठाउँमा हरेक बर्ष शहिदको तस्विरमा माल्याणपण गरिन्छ ।
जहानियाँ राणा शासनको विरुद्धमा आन्दोलनमा होमिँदा विसं १९९७ साल माघ १० गते शुक्रराज शास्त्रीलाई टेकुमा रहेको पचलीमा, धर्मभक्त माथेमालाई सिफलमा, गंगालाल श्रेष्ठ र दशरथ चन्दलाई माघ १५ गते शोभाभगवतीमा तत्कालीन राणा शासकले मृत्युदण्ड दिएको थियो । त्यसै घटनालाई स्मरण गर्दै विसं २०१२ सालदेखि हरेक वर्ष माघ १६ गतेलाई शहीद दिवसका रुपमा मनाउने गरिएको छ । केही वर्षयतादेखि भने शहीदहरुको सम्झनामा सप्ताहव्यापी कार्यक्रम भइरहेका छन् ।
नेपालको पहिलो शहीद भने लखन थापालाई मानिन्छ । थापाको तत्कालीन राणा प्रधानमन्त्री जङ्गबहादुर राणाविरुद्ध प्रचार गरेको आरोपमा १९३३ साल फागुन २ गते गोरखाको मनकामना मन्दिर नजिकै रुखमा झुण्ड्याएर हत्या गरिएको थियो ।
