दुलेगौंडा । तनहुँको शुक्लागण्डकी नगरपालिकाले शैक्षिक गुणस्तर परीक्षण केन्द्रले सार्वजनिक गरेको कार्यसम्पादन परीक्षणमा नगरभित्र उत्कृष्ट रहेको र कम अंक प्राप्त गरेको विद्यालयको अनुगमन तथा निरिक्षण गरेको छ । जहाँ नगरले जिल्लामै सर्वाेत्कृष्ट भएको जनकल्याण माध्यमिक विद्यालय र नगरपालिकामा रहेका विद्यालयहरुमा पछाडी परेको सरस्वति नमुना माध्यमिक विद्यालयको अनुगमन गरेको हो ।
नगरपालिका, विद्यालय व्यवस्थापन समिति, अभिभावक, शिक्षक र विद्यार्थीको संयुक्त प्रयासले कार्यसम्पादन परीक्षणमा जिल्लामै सर्वाेउत्कृष्ट हुन सकेको जनकल्याण माविका प्रधानाध्यापक दिपक ढकालले बताए । उनका अनुासर विद्यालयले कार्यसम्पादन परीक्षणमा ८७.७१ अंक प्राप्त गरेको छ । देशभरीमा हेर्ने हो भने यो विद्यालय १४ औँ स्थानमा परेको छ ।
विगतमा विद्यालयको गतिविधि सही रुपले हुन नसक्दा कार्यसम्पादन परीक्षणमा नगरमा पछाडी परेको सरस्वति नमुना माविका प्रधानाध्यापक नारायण पौडेलले बताए । उनका अनुसार विगतको तुलनामा हाल विद्यालयले धेरै फड्को मारेको बताए । ‘म विद्यालयको प्रधानाध्यापक भएको एक बर्ष भयो । विगतमा विद्यालय व्यवस्थापन समिति, अभिभावक संघकोे बैठक पनि नभएको, विद्यार्थीको प्रगतिको लेखाजोखा व्यवस्थित रुपले नभएको हुदाँ पछाडि परेको हो । अहिले हामीले यस्ता समस्यालाई बिस्तारै समाधान गर्दै गईरहेका छौं, आगामी दिनमा यो नतिजामा पक्कै परिर्वतन हुनेछ’ उनले भए ।
शुक्लागण्डकी नगरपालिकाका उपप्रमुख खुमबहादुर विक (राजु) विद्यालयको शैक्षिक सुधारका लागि अनुगमन गरिएको बताए । उनका अनुसार राम्रो विद्यालयको कुरा हरेक विद्यालयले अनुसरण गर्न आवश्यक रहेको बताए । नगरपालिकाले अब शुक्लागण्डकी नगरपालिकाको सम्पूर्ण विद्यालयमा आकास्मिक अनुगमन गर्ने योजनामा रहेको बताए ।
नगरका उपप्रमुख खुमबहादुर विक (राजु) को, शुक्लागण्डकी नगरपालिकाका शिक्षा शाखा प्रमुख नवराज चापागाईं लगायत पत्रकारको उपस्थितीमा दुई विद्यालयको अनुगमन गरेको हो ।
