दुलेगौंडा । नेपाली समाजमा बाबुआमाको किरिया छोराले गर्नुपर्छ भन्ने मान्यता हावि रहेको छ । तर, यता तनहुँको भिमाद नगरपालिकामा एक महिलाले परम्परागत मान्यतालाई तोड्दै बुवाआमाको अन्तिम संस्कारमा सन्तानको बराबरी दायित्व हुन्छ भन्ने सन्देश दिन किरिया बसेकी छिन् । किरिया बस्नेमा तनहुँकी उद्यमी महिला धनु राना रहेकी छिन् । उनले आफ्नो बुवाको किरिया बसेकी हुन् ।
समाजमा रहेको गलत संस्कार तोड्न बुवाको किरिया बसेको धनुलेृबताईन् । “दाई जस्तै म पनि बुवाको सन्तान हुँ, बुवाको काजकिरिया गर्नु मेरो दायित्व हो, फेरि मेरो दाई मृगौलाको बिरामी हुनुभएकोले डायलिसिसका लागि अस्पताल गैरहनुपर्ने भयो, त्यसैले म किरियामा बसेको हुँ” धनुले भनिन् “कतिपयले मलाई छोरी किन किरिया बस्नुप¥यो ? बस्नु हुदैंन भनिरहनु भएको थियो । छोरा छोरी दुवै बराबरी हुन् भन्ने समाजले बुझ्नुपर्छ ।” नेपाल घरेलु तथा साना उद्योग महासंघ, महिला उद्यमी जिल्ला कार्यसमिति तनहुँका सदस्य समेत रहेकी धनुले मृत्यु भएपछि मात्रै होईन जिवित हुदाँ पनि बुवाआमाको हेरचाह र उपचारमा छोरा र छोरी दुवैले समान सहभागिता जनाउनुपर्ने विचार व्यक्त गरिन ।
भिमाद नगरपालिकाका पुर्व मेयर मेख बहादुर थापाले बुवाआमाप्रति छोरा र छोरीको बराबरी हक र बराबरी कर्तव्य हुने बताए । “हाम्रो पुरानो प्रचलनमा बिहे गरिसकेका छोरीहरु आफ्ना बाबा र आमाको मृत्युमा ५ दिन मात्रै किरिया गर्ने चलन छ तर धनु रानाले रघु गाउँमा पहिलोपटक १३ दिनसम्म छोराले जस्तै विधि पुरा गरी किरिया बस्नुभएको छ, यसले गाउँमा उदाहरणीय सुरुवात गरेको छ ।” थापाले भने ।
नेपाल घरेलु तथा साना उद्योग महासंघ, महिला उद्यमी जिल्ला कार्यसमिति तनहुँका अध्यक्ष कल्पना गौलीले महिला उद्यमी धनुको साहसिक कदमले छोरा र छोरी समान् हुन् भन्ने सोच समाजमा स्थापित गर्न प्रेरणा प्रदान गरेको बताईन् । -अस्मिता खनाल
