दुलेगौँडा-स्थानीय तहको निर्वाचनपछि निर्वाचित भएका शुक्लागण्डकी नगरपालिकाका जनप्रतिनिधिलाई भानुभक्त बहुमुखी क्याम्पस बेलचौताराले सम्मान गरेको छ । बुधबार एक कार्यक्रमको आयोजना गर्दै क्याम्पसले नगरपालिकामा नवनिर्वाचित मेयर, उपमेयर, वडाध्यक्ष र वडा सदस्यहरुलाई स्वागत एवम समान्न गरेको हो ।
कार्यक्रममा बोल्दै शुक्लागण्डकी नगरपालिकाका मेयर कृष्णराज पण्डितले हरेक क्षेत्रमा बिक्न सक्ने विद्यार्थी उत्पादन गर्न नगरपालिका अग्रसर रहने बताए । उनले विश्व विद्यालयको शिक्षा शुक्लागण्डकीका क्याम्पस तहबाट प्रदान गरि देशकै शैक्षिक हवको रूपमा विकास गर्ने सुनाए । ‘हामीले यही क्याम्पसबाटै विश्व विद्यालयका सम्पूर्ण शिक्षा प्रदान गर्ने वातावरण तयार गर्नेछौँ । यसका लागि क्याम्पस, नगरपालिका र विद्यार्थीको त्रिपक्षिय सहयोग आवश्यक पर्दछ । विद्यार्थीले सिकेका सिपलाई रोजगारीसंग जोड्न वातावरण तयार गर्न हामी सकारात्मक रहने छौं’,उनले भने ।
शुक्लागण्डकी नगरपालिकाका उपमेयर खुमबहादुर विक (राजु)ले शैक्षिक संस्थाको शिक्षण विधि बदल्न जरुरी रहेको बताए । पढ्नका लागि मात्र शिक्षा नभई केही गर्नका लागि पनि शिक्षा हुनुपर्नेमा उनको जोड छ । साथै उनले भानुभक्त बहुमुखी क्याम्पसलाई प्राविधिक शिक्षा पढाउने थलोको रूपमा विकास गर्ने प्रतिबद्धता व्यक्त गरे । ‘भानुभक्त बहुमुखी क्याम्पस म आफै पढेको हुदाँ यहाँको समस्या सँग म चिर परिचित छु । अब यस क्याम्पसलाई प्राविधिक शिक्षा पढाउने थलोको रुपमा विकास गर्न पूर्ण रुपमाले लाग्ने छु । यसका लागि सबैको साथ र सहयोगको आवश्यकता छ’ उनले भने ।
क्याम्पस व्यवस्थापन समितिका अध्यक्ष डा.चन्द्रबहादुर थापाको अध्यक्षतामा सम्पन्न कार्यक्रममा शुक्लागण्डकी नगरपालिका–५ का वडाध्यक्ष दीर्घबहादुर थापा, क्याम्पस प्रमुख रमेशबहादुर अधिकारीले बोलेका थिए ।
