दुलेगौँडा- आदिवासी जनजाति प्रतिष्ठान शुक्लागण्डकीले आयोजना गरेको नगरस्तरीय वक्तृत्वकला प्रतियोगितामा ज्ञान बगौचा ईङ्लिस बोर्डिङ्ग स्कुलकी राधाकुमारी शाह प्रथम भएकी छिन् । ‘समृद्ध र सुखी नगर निर्माणको लागि आदिवासी जनजातिको भुमिका’ शिर्षकमा भएको वक्तृत्वकला प्रतियोगितामा १२ विद्यालयका ३० जनालाई पछाडी पार्दै शाह प्रथम भएकी हुन् ।
प्रतियोगितामा अरनिको आवसिय माध्यामिक विद्यालय कवासेकी श्रेया थापा द्धितीय, दिवस माध्यामिक विद्यालय उदेनढुंगाकी बिपना थापा तृतीय र छब्दी माध्यामिक विद्यालय छब्दी देउरालीकी मोनिका खड्का र जनकल्याण माध्यामिक विद्यालय बेलचौताराका सन्देश पौडेल सान्त्वना भएका छन् । प्रतियोगितामा प्रथम, द्धितीय, तृतीय र सान्त्वना हुनेले क्रमश : नगद २० हजार, १५ हजार १० हजार र पाँच÷पाँच हजार रुपैयाँको साथमा टफ्रि, मेडल र प्रमाण पत्र प्राप्त गरेका छन् ।
कार्यक्रममा बोल्दै शुक्लागण्डकी नगरपालिकाका मेयर किसान गुरुङले बालबालिकालाई किताबि ज्ञानमा मात्रै सिमित गर्न नहुने बताए । अतिरिक्त क्रियाकलायले बालबालिकाको व्यक्तित्व र नेतृत्व विकास गर्न सहयोग पुग्ने उनको भनाई छ ।
शुक्लागण्डकी नगरपालिकाको आर्थिक सहयोग र नेपाल आदिवासी जनजाति महासंघ नगर समन्वय परिषको बिषेश सहयोगमा प्रतियोगिता आयोजना गरिएको हो । प्रतिष्ठानका अध्यक्ष खिम कुमालको अध्यक्षतामा भएको कार्यक्रममा शुक्लागण्डकी नगरपालिकाका प्रमुख प्रशासकिय अधिकृत लिलाबल्भव न्यौपाने, सामाजिक विकास शाखा प्रमुख हिमा पोखरेल, शिक्षा शाखाका अधिकृत ज्योतिप्रकाश तिमिल्सेना, प्रध्यापक जर्नादन दाहाल लगायतको उपस्थिती रहेको थियो ।
