दुलेगौंडा । आज माघ १६ अर्थात सहिद दिवस । देश परिर्वतनको लागि प्राण आहुति दिने सहिदहरुको सम्झनामा यो दिवस मनाईन्छ । तर, आजको दिनमा पनि कतिपए सहिद पार्कमा रहेको सहिदका शालिकमा सम्झना लागि कोही नपुग्दा एक्लो भएको छ ।
जिल्लाको शुक्लागण्डकी नगरपालिका–२ हलेदीमा सहिद स्मृति पार्क रहेको छ । प्रदेश सरकारको लगानिमा जनयुद्धकालमा देश परिर्वतनका निम्ति प्राणको आहुति दिएका योद्धहरुको सम्झनामा पार्क निर्माण गरिएको थियो । पार्कमा प्रतिकात्मक योद्धाको शालिक रहेको छ । सहिदको स्मृतिमा निर्माण गरिएको शालिकमा सहिद दिवसको दिनमा समेत कसैले पनि त्यहाँ गएर सम्झना गर्न सकेनन् ।
नगरकै कोत्रे बजारमा सहिद लालध्वज पार्क रहेको छ । निर्दलिय पञ्चायती व्यवस्थाको विरुद्धमा लागेर २०१८ सालमा कोत्रे बजारमा ज्यानको बलिदान दिएका सहिद लालध्वज गुरुङ सहित सर्वसिङ गुरुङ, हस्तबीर गुरुङ र ईमानसिङ गुरुङको शालिक पार्कमा रहेको छ । सोमबार साझँ शहीद दिवसको अवसरमा नेपाली कांग्रेसको भातृ संगठन तरुण दल शुक्लागण्डकी–२ ले शहीद लालध्वज पर्कमा दिप प्रज्वलन गरेको छ ।
२०४६ सालको ऐतिहासिक राष्ट्रिय जनआन्दोलनमा प्राणको आहुति दिएका कृष्णप्रसाद पौडेलको शालिका शुक्लागण्डकी–८ पाटनमा रहेको छ । उनको नामबाट सहिद कृष्ण माधयामिक विद्यालय, सहिदकृष्ण क्याम्पस संञ्चालनमा रहेको छ । तर, दिवसको दिनमा पनि सहिद पार्कमा पुगेर उनको योगदानलाई सम्झिने कोही भएनन् ।
यि त केबल प्रतिनिधी सहीदका शालिक हुन् । यस्ता थुप्रै सहिद पार्कहरुमा आजको दिन सम्झिन पुग्नेहरु कमै छन् । यता सहिद कृष्णप्रसाद पौडेलका पुत्र हिमाल पौडेलले सहिदका सपनाको कुरा गर्नु भन्दा पनि व्यवहार लागु गर्नुपर्ने बताए । ‘शहिदलाई सम्झेर मात्र हुदैन् । शहिदले देखाएको बाटोमा पनि हिँड्न सक्नुपर्छ । के सपना देखेर प्राणको आहुति दिएका थिए ? के प्राप्ती भईरहेको छ ? राजनीतिक दलहरुले मुल्यांकन गर्न सक्नुपर्छ’ ,उनले भने ।
यता शुक्लागण्डकी नगरपालिका–८ का वडाध्यक्ष कृष्णप्रसाद रेग्मीले कोरोना महामारीको कारण भव्य रुपमा सहिद दिवस मनाउन नपाएको बताए । ‘हामीले शहीदको योगदान बिर्सन्न हुदैन् । एक दिन मात्रै हैन् हरेक दिन स्मरण गनुपर्छ । तर, यसपाली कोरोना कहरले गर्दा कार्यक्रम गरेर मनाउन पाएनौँ’, उनले भने ।
