दुलेगौंडा । मंगलबार ३०० औँ पृथ्वी जयन्तीको अवसरमा देशभरी विविध कार्यक्रम गरि मनाईएको थियो । जस अन्र्तगत तनहुँको शुक्लागण्डकीमा पनि पृथ्वीनारायण शाहलाई स्मरण गरि यो दिवस मनाईएको थियो ।
विश्व शिन्दु महासंघ शुक्लागण्डकी नगर कार्य समितिले राष्ट्र निर्माता पृथ्वीनारायण शाहको ३०० औँ जन्मजयन्ती मनाएको हो । मंगलबार शिव पञ्चायन मन्दिर दुलेगौँडामा एक कार्यक्रमको आयोजना गरी महासंघले पृथ्वीनारायण शाहलाई स्मरण गरेको हो । उक्त कार्यक्रममा बोल्दै शुक्लागण्डकी नगरपालिका–४ का वडासदस्य सन्तोष श्रेष्ठले पृथ्वीनारायण शाहले लिएको विचारलाई युवाहरुले अनुसरण गर्नुपर्ने बताएका थिए । पृथ्वीनारायण शाहको योगदानलाई विर्सन नहुने उनको भनाई थियो ।
महासंघका नगर अध्यक्ष नारायण घिमिरेले पृथ्वीनारायण शाहलाई राजाभन्दा पनि राष्ट्र निर्माताको रुपमा सम्मान गर्नुपर्ने बताए । घुस लिने र दिने दुवै देशको शत्रु भन्ने पृथ्वीनारायण शाहको दिव्यउपदेश अहिलेको समयमा पनि सान्दर्भिक भएको भन्दै उनले राज्यबाट वेवास्ता हुनु दुःखद पक्ष भएको बताएका थिए ।
यस्तै गरी सोही दिन एकता ठकुरी समाज शुक्लागण्डकीले १८ औँ बार्षिकोत्सव तथा ३०० औँ पृथ्वी जन्मजयन्ती मनाएको थियो । बेलचौतरास्थित तालडाँडा सामुदायिक भवनमा आयोजित कार्यक्रममा विविध साँस्कृतिक तथा खेलकुद कार्यक्रमसहित बार्षिकोत्सव र पृथ्वीजयन्ती संगै मनाएका हुन् । सो क्रममा समाजका अध्यक्ष क्याप्टेन बुद्धिबहादुर शाहीले पृथ्वीनारायण शाह आफुहरुको मात्र नभएर देशकै पुर्खा र राष्ट्र निर्माता भएको हुदाँ उनको योगदानलाई भुल्न नहुने बताए । टुक्रा(टुक्रमा विभाजित राज्यलाई एउटा सुत्रमा बाध्ने व्यक्तिलाई सरकारले सम्मान गर्नुको सट्टा उल्टो अपमान गरिरहेको भन्दै उनले गुनासो गरे ।
