बेलचौतारा । शुक्लागण्डकी नगरपालिका–५ बेलचौतारास्थित मिलन टोलमा रहेको अकला मार्ग कालेपत्रे गरिएको छ । गण्डकी प्रदेश सरकार अन्र्तगत पूर्वाधार विकास कार्यालयको १७ लाख ५६ हजार ८ सय रुपैयाँ लागतमा कालोपत्रे गरिएको हो । त्यस्तै, उपभोक्ताबाट ११ लाख ५४ हजार ४ सय रुपैयाँ र शुक्लागण्डकी नगरपालिकाबाट १० लाख ६ हजार ३ सय २८ रुपौयाँ लागतमा मार्गको नाला निर्माण गरिएको छ ।
पृथ्वी राजमार्गदेखि नविन बस्तिसम्म जोड्ने ३ सय ८० मिटर अकला मार्ग तथा पक्की नालाको शनिबार गण्डकी प्रदेश सभा सदस्य आशा कोईरालाले उद्घाटन गरेकी थिईन् । कार्यक्रममा बोल्दै प्रदेश सभा सदस्य कोईरालाले आफ्नो व्यक्तिगत स्वार्थका लागि भन्दा पनि समाज र राष्ट्रको आवश्यकतालाई ध्यानमा राखेर काम गर्ने बताईन् । उनले बाटो निर्माणको क्रममा केही विवाद आए पनि त्यसलाई समझदारीमा समाधान गर्न आग्रह गरिन् । ‘मोटर बाटो निर्माण गर्ने क्रममा मेरो एक हात जमिन गयो भनेर चिन्ता लिएर हुदैन, आपसी समझदारीमा समाजको हित हुने तरिकाले काम गर्नुहोस् । यस क्षेत्रमा अन्य समस्याहरु पनि रहेका छन्, ति समस्याहरुलाई हामी हातेमालो गरेर समाधान गर्नेछौ’, उनले भनिन् ।
नाला निर्माण समितिका अध्यक्ष ढाकाराम गिरीको सभापतित्वमा समपन्न कार्यक्रममा वडा नम्बर ५ का वडाध्यक्ष दीर्घबहादुर थापा, वडा सदस्य पदमप्रसाद तिमिल्सेना, अकला टोलविकास समितिका अध्यक्ष रेशमबहादुर मल्ल, समाजसेवी हिमकुमार श्रेष्ठ, दिनेश गौतम लगायतले मन्तव्य दिएका थिए । कार्यक्रममा टोलका सदस्य कमल पौडेलले स्वागत मन्तव्य दिएका थिए भने विद्या अधिकारीले कार्यक्रम संञ्चालन गरेकी थिईन् ।
