दुलेगौंडा । शुक्लागण्डकी नगर स्तरीय अपाङ्गता संञ्जालले अपाङ्ग भएका नागरीकलाई सहयोग सामग्री हस्तान्तरण गरेको छ । शुक्लागण्डकी नगरपालिकाको आर्थिक सहयोगमा संञ्जालले ३० जना अपाङ्ग भएका नागरीकलाई शुक्रबार ३० औं अन्तराष्ट्रिय अपाङ्ग दिवसको अवसरमा सहयोग सामाग्री हस्तान्तरण गरेको हो । जसमा १४ जनालाई ह्विल चियर, १५ जनालाई साधारण लठ्ठी र एक जनालाई सर्जिकल बेड हस्तान्तरण गरिएको छ ।
कार्यक्रममा बोल्दै शुक्लागण्डकी नगरपालिकाका प्रमुख प्रशासकीय अधिकृत लिला बल्ब न्यौपानेले अपाङ्गता भएका नागरीकको पहिचान गरि उनिहरुलाई शिक्षा, स्वास्थ्य र रोजगारीसंग जोडेर अगाडी बढाउनुपर्नेमा जोड दिए । यसका लागि नगरपालिकाले गर्नुपर्ने सहयोगमा आफु सकारात्मक भएको उनको भनाई छ । ‘अहिलेको यो समयमा अपाङ्ग भएका व्यक्तिहरुले आफ्नो पहिचानको लागि लडिरहनु परेको छ । उहाँहरुको सुविधाको लागि मागिरहनु परेको छ । कसैले दिए जस्तो र कसैले मागे जस्तो भएको छ । वास्तवमा यो देशका नागरीक अपाङ्ग हुदैमा दोस्रो दर्जाको हुनुपर्ने भन्ने केही पनि छैन् ।’ उनले भने , ‘विश्वमा धेरै मुलुकामा अपाङ्गता भएका नागरीकहरु मन्त्री हुनुहुन्छ । नगरपालिकाका, महानगरपालिका प्रमुख हुनुहुन्छ, उहाहरुले पनि आफ्नो ठाउँबाट लडिरहनु भएको छ । हाम्रोमा पनि अधिकारकर्मीहरु, सरोकारवाल निकाय, वर्ग संस्था धेरै छन् । तर, उहाँहरुको सार्थक सक्रियता आवश्यक छ, तब मात्रै अपाङ्गता भएका व्यक्तिहरुले वास्तविक पहिचान प्राप्त गर्ने र पहिचान अनुसारको सुविधा प्राप्त हुन्छ । यसले गर्दा राज्यका विभिन्न निकायहरुमा उहाँहरुको सहभागिता सुनिश्चित हुन सक्छ ।’
नगरपालिकाले अपाङ्गता भएको नागरिकको पहिचान गर्नका लागि परिचय पत्र वितरण गरेको अपाङ्गता समन्वय समितिकी सचिव एवम् सामाजिक विकास शाखा प्रमुख हिमा पोख्रेलले जानकारी दिईन । उनका अनुसार हाल शुक्लागण्डकी नगरपालिकामा क वर्गका १ सय ७४, ख वर्गका २ सय ८१, ग वर्गका १ सय ४४ र घ वर्गका ८२ वना गरि ६ सय ७८ जनालाई परिचय पत्र वितरण गरिएको छ । नगरले अपाङ्गता भएका व्यक्तिहरुको उपचारमा सहज गराउनका निम्ती वृहत स्वास्थ्य शिविर पनि संञ्चालन, नेतृत्व विकास कार्यक्रम लगायतका विविध क्रियाकलाप संञ्चालन गरेको पाोख्रेलको भनाई छ । नगरले अपाङ्गता भएका व्यक्तिको क्षेत्रमा गरेको कार्यले तनहुँ जिल्लामै उत्कृष्ट पुरस्कार पनि प्राप्त गरेको बताईन् ।
अपाङ्गता संञ्जालका अध्यक्ष पूर्णबहादुर सुनारको सभापतित्वमा सम्पन्न भएको कार्यक्रमा कोशिष संस्थाकी सदस्य ऋषिका पोख्रेल, वडा नम्बर ६ का वडाध्यक्ष कृष्ण पौडेल, अपाङ्गता समन्वय समितिका सदस्य दामोदर रेग्मी लगायतले शुभकामना मनतव्य दिएका थिए । कार्यक्रममा संञ्जालकी उपाध्यक्ष मोतिसरा वि.कले शुभकामना दिएकी थिईन भने संञ्जालका सचिव माधव भट्टराईले कार्यक्रमको संञ्चालन गरेका थिए ।
