हरि खरेल/दुलेगौँडा । गत बर्ष असार ११ गते टाटा सुमोको ठक्करबाट घाईते भएकी सुनिता थारु उपचार नपाएर घरमै बस्न बाध्य छिन् । बर्दिया जिल्लाको न्याउलापुर घर भई हाल शुक्लागण्डकी नगरपालिका–४ दुलेगौंडा बस्दै आएकी थारुलाई ठक्कर दिने सवारी पक्षबाट पनि पर्याप्त उपचार खर्च नदिएपछि विस्तारामा थलिएकी छन् ।
घाईते भएपछि थारुको उपचारको लागि सुरुमा फेवा सिटी हस्पिटल पोखरा लगिएको थियो । हस्पिटलको सामान्य उपचारपछि भने उनिलाई काठमाण्डौं स्थित ट्रमा सेन्टर लगियो । काठमाडौंमा उपचार गर्दा आर्थिक अवस्था कमजोर रहेकै कारण दुई महिनापछि पुरा उपचार हुन नपाई थारुलाई दुलेगौंडास्थित डेरामा फिर्ता ल्याएको श्रीमान भागिरामले बताए ।
दैनिक ज्याला मजदुरी गरेर आफुले कमाएर घरखर्च चलाउन ठिक्क हुने र श्रीमतिको सामान्य प्राथमिक उपचारमै खर्च हुने गरेको उनले सुनाए । थारुका अनुसार समयमै उपचार गर्न नसक्दा कम्मरको घाउ बढेर ढेड ईन्च भन्दा बढी गहिरो भईसकेको छ । ‘उपचार गर्न पाए त सन्चो हुन्थ्यो । पैसा छैन, सबैभन्दा ठुलो समस्या त्यही हो’, थारुले भने ।
उपचार नपाएर घरकै विस्तरामा थला परेकी थारुको दयनिय अवस्था देखेर युवाहरुको समूहद्वारा उपचारमा सघाउन शुक्रबार एक लाख रुपैयाँ सहयोग गरिएको छ । वैदेशिक रोजगारीको शिलशिलामा कतारमा रहेका तनहुँका युवा करिमबक्स मियाँको पहलमा संकलन गरिएको दुई लाख रुपैयाँ मध्यबाट शुक्रबार भागिरामलाई उपाचरमा सघाउन अभियान चलाईरहेका युवा शंकर पन्त्को समुहले एक लाख रुपैयाँ हस्तानतरण गरेको हो । पन्तका अनुसार शनिबार थारुको उपचारका लागी काठमाडौँस्थित ट्रमा सेन्टरमा लैजाने प्रबन्ध मिलाईएको छ । उपचार गर्दै जादा उक्त रकम सकिएपछि फेरी बाँकी एक लाख रुपैयाँ दिईनेछ । ‘त्यो रकमले पनि नपुगे हामीले पनि आर्थिक संकलन गर्नेछौँ । कम्तीमा पनि घाउ निको बनाएर ह्विलचियरमा बस्न सक्ने बनाउनेछौँ’, उनले भने । थारुलाई स्पाईनल इञ्जुरीको पनि समस्या छ । उपचार सम्भव भएको खण्डमा यसका लागी पनि पहल गरिने जनाईएको छ ।
