दुलेगौंडा । सांग्रिला डेभलपमेन्ट बैँक दुलेगौँडा शाखाले वित्तिय साक्षरताको लागि घर दैलो अभियानलाई तीब्रता दिदै आएको छ । जनतालाई बचत गर्ने बानी बसाउने उद्देश्यले बैँकको विभिन्न शाखाहरुमार्फत् यो अभियान सञ्चालन गरिरहेको शाखा प्रबन्धक दिबाकर भण्डारीले जानकारी दिए ।
बैंकले आफ्नो वार्षिक उत्सवको अवसरमा विभिन्न वित्तिय कार्यक्रमसहित गाउँ टोलमा पुगेर साँग्रिला घर दैलो खाता खोल्ने अभियान चलाएको हो । जस अन्र्तगत शनिबार शाखाले शुक्लागण्डकी नगरपालिका–१, शेराबेशीका स्थानीयहरुलाई बैकिङ कारोबारबारे जानकारी प्रदान गरेको छ । जहाँ बैँकले दिने सेवा सुविधासहित बचत किन गर्ने, कसरी गर्ने, खाता कसरी खोल्ने, चेक कसरी काट्ने, पैसा जम्मा कसरी गर्ने लगायतका विविध विषयबारे जानकारी प्रदन गरेको प्रबन्धक भण्डारीले बताए । ‘पैसाको सहि परिचालन र बचतका लागि सवैभन्दा पहिला वित्तिय साक्षरता आवश्यक छ,यस विषयमा गाउँ गाउँका अधिकाँश जनताहरु अनविज्ञ हुनुहुन्छ, हामीले दुरदराजका गाउँबस्तीहरुलाई प्राथमिकता दिएर वित्तिय साक्षरता अभियान चलाइरहेको छौँ ।’ उनले भने ।
कार्यक्रममा बोल्दै शुक्लागण्डकी नगरपालिका–१ की वडा सदस्य शुशिला कुवंरले बैँकको दैलो नटेकेको र खाता पनि नखोलेकाहरुका यो कार्यक्रम निकै नै फलदायिक रहेको बताईन । साथै स्थानीय शिक्षक ठाकुरप्रसाद खनालले बैँक तथा वित्तिय संस्थाले जनमुखी सेवा प्रवाह गरे अधिकाँश जनता बैँकको पहुँचमा पुग्ने बताए । उनले सरल र छिटोछरितो सेवा दिने बैँक नै सेवाग्राहीको रोजाईमा पर्ने बताउँदै यी विषयहरुलाई ध्यान दिएर अगाडी बढ्न सुझाव पनि दिए ।
बैंकले देशभर छरिएर रहेका ९७ शाखामार्फत छिटो, छरितो, सरल तवरले न्युनतम ब्याजदरमा कर्जा सुविधा,बचततर्फ आकर्षक ब्याज, रेमिट्यान्स सुविधा, माबवाइल बैंकिङ, एटीएम, आस्वा लगायतका सेवा दिँदै आएको छ । बैँकले दशैँ तिहारको छेको पारी मुद्धती खातामा तीन महिना ,छ महिना र एक बर्षमध्ये जुनसुकै समय अवधिमा राखे पनि ९.५० प्रतिशत व्याज दिदै आएको छ ।
