दुलेगौंडा । प्रसिद्ध धार्मिक स्थल मुक्तिनाथ शुक्लागण्डकी च्यवनधाममा शिव महिमा बोलबम धार्मिक महोत्सव हुने भएको छ । आगामी भदौ १ देखि ८ गतेसम्म धार्मिक महोत्सव हुने आयोजकले जनाएको छ ।
महोत्सवलाई व्यवस्थित रूपमा सम्पन्न गर्न शनिबार बसेको तयारी भेलाले ठाकुरप्रसाद शास्त्रीको संयोजकत्वमा मूल समारोह समिति तथा विभिन्न २५ उपसमिति गठन गरेको छ । मूल समारोह समितिको उपसंयोजकमा होमनाथ लम्साल र पार्वती पौडेल चयन भएका छन् भने मूल समारोह समिति सदस्यमा कार्यपालिका सदस्य रीता नेपाली चयन भएकी छिन् ।
धार्मिक महोत्सवमा प्रसिद्ध कथावाचक विदुषी आँचल बसेलले दैनिक धार्मिक प्रवचन गर्ने छिन् । साथै बोलबम यात्रा, कलश यात्रा, शिवपूजन, रुद्राभिषेक, भजन–कीर्तन, झाँकी प्रदर्शन, तुलादान तथा विविध धार्मिक एवं सांस्कृतिक कार्यक्रम सञ्चालन गरिनेछन्।
