दुलेगौंडा । सरस्वती जुनियर कपमा छात्रतर्फकाे फुटबल प्रतियाेगितामा तालवेसी माध्यमिक विद्यालय प्रथम भएको छ भने छात्रातर्फकाे फुटबल प्रतियोगितामा अरनिको इङलिस बाेर्डिङ्ग स्कुल खैरेनीटार प्रथम भएको छ ।
छात्र फुटबल प्रतियोगितामा तालवेसीले अरनिको खैरेनीटारलाई ३-० गाेल अन्तरले पराजित गर्दै उपाधि हात पारेको थियाे । जितसंगै तालवेसीले ट्रफी, मेडल र प्रमाणपत्र प्राप्त गरेको छ भने उपविजेता अरनिकोले मेडल र प्रमाणपत्र प्राप्त गरेको छ ।
छात्रातर्फकाे फुटबल प्रतियोगितामा अरनिको खैरेनीटारले आयाेजक सरस्वती नमुना माध्यमिक विद्यालयलाई पराजित गर्दै उपाधि हात पारेको छ । प्रतियोगिता अवधिभर दुबै टिमले समान १/१ गाेल गरेपछि खेल पेनाल्टी सुटआउटमा पुगेको थियाे । जहाँ अरनिकोले सरस्वतीलाई पेनाल्टीमा ६-४ गाेल अन्तरले पराजित गर्दै उपाधिको रक्षा गरेको हाे । जितसंगै अरनिकोले शिल्ड मेडल र प्रमाणपत्र प्राप्त गरेको छ भने उपविजेता सरस्वतीले मेडल र प्रमाणपत्र प्राप्त गरेको छ ।
प्रतियोगितामा छात्रतर्फ सर्वाेत्कृष्ट खेलाडी तालवेसीमा कृतन कार्क, उत्कृष्ट गाेलरक्षक तालवेसीका राशन गुरूङ र सर्वाधिक गाेलकर्ता सुर्यदय इङलिस बाेर्डिङ स्कुलका समीर तामाङ भएका थिए ।
यसैगरी छात्रा फुटबल प्रतियोगितामा सर्वाेत्कृष्ट खेलाडी सरस्वती नमुनाकी प्रिन्सेस थाप, उत्कृष्ट गाेलरक्षक अरनिको खैरेनीटारकी समीक्षा क्षेत्री र सर्वाधिक गाेलकर्ता अरनिको खैरेनीटारकी संस्कृति श्रेष्ठ भएकी थिइन् ।
प्रतियोगितामा विजेतालाई शुक्लागण्डकी नगरपालिका-७ का वडाध्यक्ष खड्क सिं थापा, विद्यालयका प्रधानाध्यापक नारायण पाैडेल, सहायक प्रअ सञ्जिव श्रेष्ठ लगायतले पुरस्कार वितरण गरेका थिए ।
