दुलेगौंडा । इलाका प्रहरी कार्यालय बेलचाैताराले नागरिक सुनुवाइ कार्यक्रम गरेको छ । `पारदर्शिता र सूचनाको सुनिश्चितता हाम्रो प्रतिबद्धता´ भन्ने नाराका साथ प्रहरीले जनप्रतिनिधि, राजनीतिक पार्टीका प्रतिनिधि, युवा क्लब, समाजसेवी, सरकारी तथा गैह्र सरकारी संस्थाका प्रतिनिधि, पत्रकारकाे उपस्थितिमा नागरिक सुनुवाइ कार्यक्रम गरेको हाे ।
कार्यक्रममा बाेल्दै शुक्लागण्डकी नगरपालिकाका नगर उपप्रमुख खुमबहादुर विक (राजु)ले प्रहरी र नागरिक बिचकाे नागरिक सुनुवाइ कार्यक्रमले नगर क्षेत्रभित्र शान्ति कायम गराउन महत्त्वपूर्ण भुमिका निर्वाह गर्ने बताए । नगरमा हुने न्यायीक समितिले पनि प्रहरीकाे सहयोगमा विभिन्न विवाद समाधान गर्न सहयोग पुगेको बताउदै प्रहरीलाई पनि आवश्यक सहयोग गर्न नगरपालिका तयार रहेको बताए ।
कार्यक्रममा बाेल्दै इलाका प्रहरी कार्यालय बेलचाैताराका प्रमुख पाेषण थापाले जनताको साथमा रहेर प्रहरीले समाजमा शान्ति कायम गर्न सक्ने बताए । समाजमा हुने विभिन्न किसिमका घटनाको पहिलो सुचना संवाहक सम्बन्धित स्थानका नागरिक हुने हुदाँ यस्ता घटना समाधान गर्न प्रहरीलाई सुचना दिई सहयोग गर्न आग्रह गरे । साथै नागरिकबाट उठेका गुनासाहरू सम्बाेधन गर्न प्रहरी कार्यालय तयार रहेको बताए ।
नागरिक सुनुवाइ कार्यक्रममा प्रहरी नायव निरीक्षक सुरज राजशंकरले हालसम्म प्रहरी कार्यालयबाट चालु आर्थिक बर्षमा २९ हजार बढीले सेवा लिएको बताए ।
अस्थायी ट्राफिक प्रहरी पाेष्ठले याे आर्थिक बर्षमा ८० लाख ९७ हजार बराबरको राजश्व सङ्कलन, नदिजन्य पदार्थ ओसारपसार सम्बन्धि कारबाही अन्तर्गत ८ सवारीलाई नियन्त्रणमा लिई १ लाख १२ हजार जरिवाना तिराइएकाे राजशंकरले बताए । कार्यालयकाे क्षेत्राधिकार पर्ने स्थानमा रहेका करिब ५ हजार बाेट गाँजा फडानी, १९४ वटा समुदाय प्रहरी साझेदारी कार्यक्रम गरिएको छ । साथै ४१ वटा सिसि क्यामेरा जडान गरी माेनिटरिङ मार्फत सेवा प्रदान गर्नुका साथै फरार प्रतिवादी पक्राउ गरि फैसला कार्यान्वयन गरिरहेकाे बताए ।
प्रहरी निरीक्षक थापाकाे सभापतित्वमा सम्पन्न कार्यक्रम विभिन्न वडाका वडाध्यक्ष, नागरिक समाजका प्रतिनिधि, युवा क्लबका प्रतिनिधि, राजनीतिक दलका प्रतिनिधि, समाजसेवी लगायतले लागू ओैषध दुर्वयसन, करणी, दुर्ववहार लगायतका विषयमा जानकारी गराउदै समाधानका उपाय पनि बताएका थिए ।
