दुलेगौडा । अंग्रेजी शब्दावलीको भण्डारण बृद्धि गराई सिकाईलाई फराकिलो बनाउन भन्दै शुक्लागण्डकी नगरपालिका वडा नं. ९ मा अवस्थित तालवेसी मा.वि.ले विद्यालयमा स्क्यावल च्याम्पीयनसिपको आयोजना गर्ने भएको छ ।
असोज ६ गते आइतवारको दिन विद्यालयमा स्क्यावल च्याम्पीयनसिपको आयोजना गर्न लागेको बताउँदै विद्यालयका अतिरिक्त क्रियाकलाप संयोजक शिक्षक दामोदर रेग्मीले कक्षा ७ देखि १० सम्मका विद्यार्थीहरुको अंग्रेजी शब्दावलीको क्षमता बढाउने महत्वपूर्ण खेल स्क्रयावल विद्यालयमा केहि बर्षदेखि मात्र सुरु गरेको बताए । उनले बाराको सिमरामा गत वर्षको राष्ट्रिय च्याम्पियनसिपमा समेत विद्यालयले सक्रिय सहभागिता जनाएको बताए । तनहुँ जिल्लाका स्क्रयावल संयोजक विनोद पौडेलले तनहुँमा पछिल्लो समय संस्थागत विद्यालयमा मात्र नभई सामुदायिक विद्यालयमा समेत स्क्यावलले विस्तारै अगाडि बढेको बताए । यस वर्षको गुल्मिमा आयोजना हुँदै गरेको राष्ट्रिय स्क्यावल च्याम्पीयनसिपको लागि प्रतिनिधि छनौटको कार्य समेत छिट्टै गरिने उनले वताए ।
