दुलेगौडा । शुक्लागण्डकी नगरपालिका वडा नं. ९ मा अवस्थित तालवेशी माध्यमिक विद्यालयमा स्क्य्रावल क्लव गठन गरिएको छ । विद्यालयमा कक्षा ७ देखि १० सम्म अध्ययनरत विद्यार्थीहरुको भेलाले क्लव गठन गरिएको विद्यालयका प्रधानाध्यापक ध्रुव वाग्ले बताए। अंग्रजी शब्द निर्माण प्रक्रियाबारे सहजता दिने इन डोर गेम स्क्य्रावलमा गत वर्ष राष्ट्रिय स्तरमा बाराको सिमरामा सम्पन्न खेलमा पनि यस विद्यालयले सहभागिता जनाएको शिक्षक दामोदर रेग्मीले बताए ।
यस वर्ष राष्ट्रिय स्तरको खेल गुल्मिमा हुने बताउँदै विद्यार्थीहरुमा अंग्रजीका शब्द भण्डार बढाउन यस खेल बढि महत्व रहेको बताए । विद्यालयका अंग्रेजी शिक्षक सुवास चापागाईले विद्यार्थीहरुको खेल प्रतिको अभिरुचि बढाउँदै कक्षा ७ देखि १० सम्मको लागि कक्षागत रुपमा स्क्य्रावल वोर्ड वितरण गरेको बताए । उक्त भेलाले कक्षा १० का विद्यार्थी प्रथम पाठकको संयोजकत्वमा ९ सदस्यीय समिति पनि गठन गरेको छ । कार्यक्रममा विद्यालयका नायक अंकित थापाले स्क्य्रावल खेलको बारेमा प्रष्ट पारेका थिए भने सह नायक युविका राउतले कार्यक्रममा स्वागत मन्तव्य राखेकी थिइन् ।
