दुलेगौंडा । तेस्रो शुक्लागण्डकी महोत्सव–२०८० लाई केन्द्रित गर्दै शुक्लागण्डकी नगर उद्योग वाणिज्य संघ र लेखनाथ उद्योग वाणिज्य संघबीच अन्तरक्रिया गर्नुका साथै सुझाव संकलन गरिएको छ । दुबै संघका पदाधिकारीसहितको सहभागितामा भएको छलफलमा शुक्लागण्डकी महोत्सलाई सफल र प्रभावकारी बनाउने विषयमा सुझाव संकलन गरिएको शुक्लागण्डकी नगर उद्योग वाणिज्य संघका महासचिव उपेन्द्र तिमिल्सीनाले जानकारी दिए ।
लेखनाथ उद्योग वाणिज्य संघले गत पुष ५ देखि १६ गतेसम्म १९ औं संस्करणको महोत्सव सम्पन्न गरेको छ । लेखनाथ उद्योग वाणिज्य संघका अध्यक्ष विनोद श्रेष्ठ, शुक्लागण्डकी नगर उद्योग वाणिज्य संघका अध्यक्ष विमल प्रसाद रिमाल र पदाधिकारीको सहभागितामा सो कार्यक्रम भएको हो । ‘हरेक संस्करणको लेखनाथ महोत्सव दर्शकले रुचाएका छन । शुक्लागण्डकी नगर उद्योग वाणिज्य संघका अध्यक्ष रिमालले भने,’ ‘कुन पाटोलाई ख्याल गर्दा हाम्रो पनि सफल बनाउन सकिन्छ भन्ने विषयमा धेरै सुझावहरु आएको छ । प्राप्त सुझावले महोत्सव थप प्रभावकारी हुने छ ।’
आर्थिक समाजिक खेलकुदको विकास, कृषि तथा पर्यटनको प्रवद्धन, शुक्लागण्डकी महोत्सव कला सिप र संस्कृतिको संरक्षण भन्ने मुल नाराका साथ माघ २६ देखि फागुन ८ गतेसम्म महोत्सव हुदै छ । महोत्सव शुक्लागण्डकी–५, बेलचौतारास्थित भानुभक्त बहुमुखी क्याम्पसको परिसरमा हुने छ । महोत्सवमा विभिन्न जातजातिका साँस्कृतिक एवम् झाँकी प्रदर्शनी, तीनखोलेदेवी, ढोरवाराही मन्दिर दर्शन, रकगार्डेन, दगाम, भूजिकोट भ्यू टावर, भुमे भैरव मन्दिर तथा ऐतिहासिक स्थानथोक दरवार अवलोकन एवम् मिलेनियम ट्रेक पदयात्रालाई निरन्तरता दिइएको छ । साथै ख्याती प्राप्त राष्ट्रिय तथा स्थानीय कलाकारद्धारा सांगितिक कार्यक्रम, दैनिक उपभोग्य वस्तु तथा सेवाहरुको प्रदर्शनी एवम् खरिद विक्रि, कृषि उत्पादनहरुको प्रदर्शनी तथा विक्रि समावेश गरिएको छ । साथै भलिबल प्रतियोगिता,कौरा, नृत्य प्रतियोगिता, गण्डकी गायन प्रतियोगिता, रत्यौली प्रतियोगिता समावेश गरिएको छ । सम्पूर्ण वडा व्यवस्थापन समिति र महिला उद्यमी विकास समितिको सह–आयोजना र नेपाल उद्योग वाणिज्य महासंघ गण्डकी, नेपाल उद्योग वाणिज्य महासंघ र नेपाल पर्यटन वोर्डको प्रवद्धनमा महोत्सव हुन लागेको हो । महोत्सवमा १ सय ७५ स्टल रहने छन् ।
