खैरेनीटार । विपद् ब्यबस्थापनका पुर्व तयारी स्वरूप श्री नं.३ राजदल गण खैरेनीटार व्यारेक, तनहुँको सक्रिय समन्वयकारी भुमिकामा आइतबार विपद् व्यवस्थापन तालिम, अभ्यास तथा प्रदर्शनी कार्यक्रम सम्पन्न भएको।
उक्त कार्यक्रममा शुक्लागण्डकी नगरपालिका, भिमाद नगरपालिका र घिरिङ्ग गाउपालिकाका विपद् व्यवस्थापन संग सम्बन्धित फोकल व्यक्ति तथा वडाका प्रतिनिधिहरु, ईलाका प्रहरी कार्यालय बेलचौतराका प्रतिनिधि, जीपी कोइराला राष्ट्रिय श्वास प्रश्वास उपचार केन्द्रका र्यापीड रेस्पोन्स टीमका डाक्टर प्रतिनिधि, रेडक्रस उपशाखा बेलचौताराका प्रतिनिधि, श्री नं. ३ बाहिनी अड्डाका सहायक बाहिनीपति श्री विजित राज रेग्मी (PHD), श्री नं. ३ राजदल गणका गणपति प्रमुख सेनानी श्री रवि खड्का, गणमा कार्यरत अधिकृतहरु लगाएत श्री नं. ३ राजदल गणमा रहेका नेपाली सेनाका जवानहरुको उपस्थिति रहेको ।
उक्त तालिम तथा अभ्यासको अवसरमा श्री नं. ३ राजदल गणका गणपतिबाट उपस्थित सम्पुर्णलाई आफ्नो स्वागत मन्तव्य मार्फत विपद् व्यवस्थापनमा नेपाली सेनाको भुमिका, क्षमता र गर्दै आईरहेको उल्लेखनिय कार्यहरुको जानकारी गराउनुको साथै, विपद् व्यवस्थापन कार्य कुनै एक निकायले मात्र गर्न सम्भव नहुने हुंदा सो कार्यमा स्थानिय निकाय, जनप्रतिनिधि, सम्बद्ध विभिन्न संघ सस्था तथा अन्य सुरक्षा निकायहरुको सामुहिक प्रयासबाट विपद्को दौरान जनधनको क्षति न्युनिकरण गर्न सकिने अभिप्रायका साथ यस तालिम/अभ्यास प्रदर्शनी कार्यक्रम आयोजना गरिएको भनाई व्यक्त गर्नुभएको ।
उक्त कार्यक्रममा विपद् व्यवस्थापनमा प्रयोग हुने विभिन्न ईम्प्रोभाईज्ड सामाग्रीको स्टल बनाई विभिन्न प्रदर्शनी तथा प्रयोग सम्बन्धि डेमो सञ्चालन गरिएको । डेमोस्ट्रेशन ईलाकामा नदी तर्ने, आगो निभाउने, प्राथमिक उपचार, उद्धार , लगाएत विभिन्न डोरिको प्रयोगको डेमो प्रदर्शन गरि स्थानियलाई अभ्यास समेत गराईएको ।
विपद् प्रतिकार्य सम्बन्धी अभ्यासबाट उपस्थित स्थानियाहरु लाभान्वित भएको तथा विपद्को समयमा सुरक्षा निकाय तथा स्थानीय जनप्रतिनिधिहरु एक आपसमा समन्वय गरेमा प्रभावकारी ढंगवाट विपद् व्यवस्थापन कार्य सम्पादन गर्न सकिने तथा यस्ता अभ्यासलाई निरन्तरता दिनुपर्ने राय उपस्थित सरोकारवाला निकायका प्रतिनिधिहरुले व्यक्त गरेका थिए ।
