भिमाद । तनहुँको भिमाद नगरपालिका–५ मिछुर्लुङ्गमा जनस्तरबाट रकम संकलन गरि भ्यू टावार निर्माण गरिएको छ । ग्रामीण पर्यटन तथा मिछुर्लुङ्ग सामुदायिक होमस्टेको प्रवद्र्धन गर्न भ्यूटावर निर्माण गरिएको हो । निर्माण सम्पन्न भएपछि शनिबार भिमाद नगरपालिकाका प्रमुख दधिराज सुवेदीले भ्यू टावरको उद्घाटन गरे ।
मगर समुदायको बाहुल्यता रहेको मिर्छुलुङ्गमा बनेको भ्यू टावरले ग्रामीण पर्यटन तथा मिछुर्लुङ्ग सामुदायिक होमस्टेको प्रवद्धन टेवा पुग्ने भिमाद नगरपालिकाका मेयर सुवेदीले बताए । भिमादको पर्यटकीय क्षेत्र रुपमा विकास भएको मिछुर्लुङ्गमा रहेका जनताले गरेको कार्य प्रशंसनिय रहेको उनले बताए । ‘जनताको घरमा खान लगाउन नभएको बेला भ्यू टावर बने भनेर आवाज उठाउनेहरुले यस कार्यप्रति आलोचना गर्नु राम्रो होईन । देशमा रोजगारिको अवस्था र्सिजना नभएपछि विदेश गएर रोजगारी गरेर कमाएको पैसाले जन्म भुमिका लागि केही गर्नु भएको छ । यो निकै प्रशंसनिय कार्य हो’ उनले भने ।
मिछुर्लुङ्गमा होमस्टे रहे पनि आन्तरिक तथा बाह्य पर्यटकहरु आउन नसकेको हुदाँ पर्यटकलाई आकर्षित गर्न भ्यू टावर निर्माण गरिएको टावर निर्माणका योजनाकार स्थानीय महेन्द्र आलेले बताए । ‘मेरो जन्म गाउँ मिर्छुलुङ्ग हो । म १२ बर्ष देखि युकेमा छु । युकेमा रहदाँ यूट्युब हेर्दा नेपालका विभिन्न ठाउँमा बनेका भ्यू टावरले आन्तरिक तथा बाह्य पर्यटक आकर्षित गरेको देखेको थिए । मिछुर्लुङ गाउँमा होमस्टे संञ्चालनमा आएको थियो तर यहाँ आन्तरिक तथा बाह्य पर्यटक आउन नसकेको अवस्थामा मेरो जन्म ठाउँमा केही गर्न सकेमा पर्यटकहरुको संख्या बढ्ला भनेर यो भ्यूटावरको परिकल्पना गरेको थिए’ उनले भने ।
ग्रामीण पर्यटन तथा होमस्टेको प्रबद्र्धनका लागि होमस्टे निर्माण गरिएको मिर्छुलुङ्ग भ्यू टावर निर्माण समितिका अध्यक्ष नरेन्द्र थापाले बताए । पर्यटकको आर्कषणको रुपमा मिछुर्लुङ्गमा मगर समुदायको कौराहा, झ्याउरे, प्रकृति रुपमा रहेको ढुङ्गे पहरो, झरना, स्थानीय उत्पादनबाट बनार्ईएका अर्गानिक खानाका परिकार साथै भ्यू टावर रहेको बताए ।
मिछुर्लुङ्ग मगर समुदायको बाहुल्यता रहेको क्षेत्र हो । यहाँ २०७२ सालमा होमस्टे संञ्चालनमा आएको थियो । पर्यटकको आर्कषणका लागि हाल यस ठाउँमा ३८ लाख रुपैयाँको लागतमा भ्यु टावरको निर्माण गरिएको हो ।
