नगर प्रमुखमा कृष्णराजको जित पक्का
दुलेगौंडा, शुक्लागण्डकी नगरपालिकाको स्थानीय तह निर्वाचन अन्तर्गत बैशाख ३० गते भएको मतदानको मतगणना अन्तिम चरणमा पुगेको छ । १२ वडा मध्ये १० वटा वडाको नतिजा सार्वजनिक भै सकेको छ भने ११ र १२ पनि अन्तिम चरणमा पुगेको छ ।
हालसम्मको मतगणनाको परिणाम अनुसार नगर प्रमुखमा गठबन्धनको तर्फबाट नेपाली काँग्रेसका उमेद्वार कृष्णराज पण्डितको जित सुनिश्चित भएको छ । उनका निकटतम प्रतिश्पर्धी नेकपा एमालेका मुक्तिनाथ तिमिल्सिनासँग मतान्तर गन्न बाँकी भन्दा धेरै रहेको मत परिणामले देखाएको छ । वडा नं ११ र १२ को मतगणना सकेपछि उनको जितको औपचारिक घोषणा हुनेछ । उप प्रमुखमा पनि गठबन्धनको तर्फबाट नेकपा माओवादीका उमेद्वार खुम बहादुर विकले झण्डै २ सयको मतान्तरले नेकपा एमालेकी उप प्रमुख फुलमाया वाग्लेलाई पछाडी पारेका छन् । हाल गणना भएको मतको परिणामलाई हेर्दा शुक्लागण्डकी नगरपालिकाको प्रमुख र उप प्रमुख दुवै पदमा गठबन्धनमा उमेद्वारको जित हुने देखिएको छ ।
