बैशाख २६, २०७९
संजय अधिकारी
सप्तरी- सोमबार देखि सप्तरीमा मतदान अधिकृत र सहायक मतदान अधिकृत सम्बन्धित मतदान केन्द्र र मतदान स्थलमा यहि ३० गते हुने स्थानिय तह निर्वाचन सम्पन्न गर्न खटिएका छन ।
मतदान केन्द्रमा मतदान अधिकृत र सहायक मतदान अधिकृतको रूपमा खटाउनु अघि सम्बन्धित अधिकृत कर्मचारीहरूलाइ तालिम सञ्चालन गरिएको मुख्य निर्वाचन अधिकृत चन्द्रमणि ज्ञवालीले बताए । जिल्लाका १६४ मतदान स्थल र ५३६ मतदान केन्द्रमा खटिने सबै अधिकृतहरूलाइ तालिम सन्चालन गरेर मात्रै फिल्डमा खटाइएको उनले जानकारी दिए । दुइ दिन सम्म चलेको उक्त तालिममा मतदानको प्रक्रिया, कानुनी, व्यवहारिक र सैद्धान्तिक पक्षका विषय समेटिएको सप्तकोशी नगरपालिकाका निर्वाचन अधिकृत विष्णु निरौलाले बताए ।
हाल सप्तरी जिल्लामा जम्मा ४ लाख १२ हजार ४ सय ४५ मतदाता भएको निर्वाचन आयोगले जनाएको छ । मतदान र सहायक मतदान अधिकृतको नियुक्ति संगै मतदानस्थल, निर्वाचन अधिकृतको कार्यालय र समग्र निर्वाचन क्षेत्रको व्यवस्थालाइ चुस्त पारिएको मुख्य निर्वाचन अधिकृत चन्द्रमणि ज्ञवालीले बताए । यस निर्वाचनलाइ सफल रूपमा सम्पन्न गराउन प्रत्येक स्थानिय तहमा नेपाली सेना, नेपाल प्रहरी र सशस्त्र प्रहरी बलको विभिन्न टोलीहरू मार्फत सुरक्षाको बन्दोवस्ती गरिएको प्रमुख जिल्ला अधिकारी जनार्दन गौतमले बताए । ‘लोकतन्त्रमा आवाधिक चुनावको सफल अभ्यास र कार्यान्यवन सही रूपमा नागरिकको प्रतिनिधित्व हुन स्वच्छ, निष्पक्ष र भयरहित वातावरणमा हरेक नागरिकले संवैधानिक रूपमा प्राप्त मताधिकारको प्रयोग स्वतन्त्र रूपमा हुन जरूरी हुन्छ’ प्रमुख जिल्ला अधिकारीले बताए ।
२७ गते देखि मतदान अधिकृत तथा सहायक मतदान अधिकृतहरूले मतदाता परिचय पत्र वितरण गर्ने, आवश्यक सुचना टाँस गर्ने, मतदान केन्द्रमा आवश्यक पर्ने पुर्वाधारहरूको निर्माण गर्ने तथा सर्वदलिय बैठक गरी आवश्यक कार्यहरू गर्ने जिम्मेवारी रहेको मतदान केन्द्रमा खटिएका एक मतदान अधिकृतले बताए ।
