“यी मान्छे, यी नजरहरु, जज्जब लाग्यो
शून्य शून्य छन् खप्परहरु, गज्जब लाग्यो”
गजलकार जर्नादन दाहालको ‘यी मान्छे यी नजर’ गजल संग्रह विमोचन भएको छ । शनिबार शुक्ला साहित्य सङ्गम प्रतिष्ठान तनहुँको १८० औं काव्य शृङ्खला तथा स्रष्टा सम्मान कार्यक्रममा दहालको सो कृति विमोचन भएको हो ।
विमोचन कार्यक्रममा बोल्दै साहित्यकार एवम् कृतिका समिक्षक रुपिन्द्र प्रभावी जोशीले समग्र नेपाली साहित्यको सुन्दर कृति मध्यको एक उत्कृष्ट रचना यी मान्छे यी नजर रहेको बताए । गजल संग्रहमा रहेका अधिकांश रचनाहरु निराशवादी कम आशावादी बढी रहेको बताए । साहित्यकार दाहालको कृतिमा स्वच्छन्दतावाद, मानवतावाद, आशावाद, समाजमा रहेको विकृतिको व्याङ्ग्यात्मक प्रस्तुति, लयात्मक र प्रतिकात्मक भाषा शैलिको प्रयोगले गजल आफैमा पूर्ण रहेको बताए । समिक्षक जोशीले संग्रहका केही कृतिमा निपातको प्रयोग अलि बढि रहेको बताए । साथै संग्रहका एक÷दुई ठाउँमा काव्य दोहोरीएको उक्त प्रवृत्तिलाई कम गर्दै जान सुझाव पनि दिए ।
साहित्यकार दहालले पहिलो कृति माधुरि–२०६३ गजल संग्रह प्रकाशन गरि साहित्य क्षेत्रमा प्रवेश गरेका थिए । त्यसपछि उनले उद्वेलित मनहरु (गजल संग्रह–२०६४), कविको मृत्यु (कविता संग्रह–२०६४) प्रकाशनमा रहेका छ । वि सं. २०३० सालमा झापामा जन्मेका दहालले पछिल्लो सयम तनहुँलाई आफ्नो कर्मभुमि बनाएर बसेका छन् । उनि शिक्षण पेशामा पनि आबद्ध छन् ।
