दुलेगौंडा । शुक्लागण्डकी नगरपालिका–१० मा प्रधान कार्यालय रहेको शुक्ला कृषि पर्यटन सहकारी संस्थाले सार्वजनिक सुनुवाई गरेको छ । दुग्ध प्रशोधन केन्द्र सञ्चालन गर्नलाई शहकारीले दुलेगौंडास्थित होटल मिड टाउनमा नेपाल लाइभस्टक सेक्टर इनोभेसन आयोजना विकेन्द्रिकृत आयोजना सहयोग ईकाई पोखरासँग दुग्ध प्रशोधन केन्द्र सञ्चालनका लागी भएको सम्झौता अनुसार सार्वजनिक सुनवाई गरेको हो ।
कार्यक्रममा बोल्दै शुक्लागण्डकी नगरपालिकाका मेयर किसान गुरुङले किसान सहकारीको माध्यमबाट समृद्धिको बाटोमा अगाडी बढ्नुपर्ने बताए । उनका अनुसार नगरपालिकाले कृषि र पशुपालन क्षेत्रमा नगरले लगानी गरिरहेको छ । नगरपालिकाले किसानको उत्पादन खेर जान नदिन कोल्डस्टोर, कृषि संकलन केन्द्र निर्माण गरिरहेको बताए । ढोरफिर्दी, खैरेनीटार र दुलेगौडा बजारमा नगरपालिकाले हाटबजार संञ्चालन गर्न लागेपनि जग्गा अभावका कारण दुलेगौँडामा मात्रै काम सुरु भएको मेयर गुरुङले बताए ।
शुक्लागण्डकी नगरपालिका–१२ का वडाध्यक्ष मनराज गुरुङले सहकारीले किसानको उत्पादनलाई दैनिक आम्दानिसंग जोड्न अहम भुमिका खेलेको बताए । सहकारी किसानमुखी बन्नुपर्नेमा उनको जोड छ ।
किसानको उत्पादनमा वृद्धि गर्न मात्रै नभई गुणस्तरतामा पनि ध्यान दिनुपर्ने नेपाल लाईभस्टक सेक्टर ईनोभेसन आयोजनाका विज्ञ निर्मलप्रसाद चापागाईले बताए । सहकारी नाफमुलक नभई किसानको आयआर्जनमा वृद्धि गर्ने उद्देश्य अनुरुप अगाडी बढ्नुपर्ने उनको भनाई छ ।
सहकारीले दुग्ध प्रशोधन केन्द्र निर्माणका लागि कुल ९९ लाख २९ हजार ३ सय ९९ लाग्ने बताएको छ । जसमा १९ लाख ४० हजार ६ सय ४७ रुपैयाँ अर्थात २० प्रतिशत सहकारीले लगानी गर्नेछ । ३० लाख २४ हजार ३ रुपैयाँ अर्थात ३० प्रतिशत ऋण राष्ट्रिय शहकारी बैंक दमौली शाखाले लगानी गर्नेछ र नेपाल लाइभस्टक सेक्टर इनोभेसन आयोजना विकेन्द्रिकृत आयोजना सहयोग इकाईले ४९ लाख ६४ हजार ६ सय ५० रुपैयाँ अर्थात ५० प्रतिशत अनुदान उपलब्ध गराउने सहकारीका अध्यक्ष मुक्ति सिग्देलले बताए ।
सहकारीले गाउँका किसानले उत्पादन गरेको दैनिक १२ सय लिटर दुध बजारीकरण गर्दै आईरहेको छ । वि सं. २०७४ सालमा स्थापना भएको सहकारीमा हाल २ हजार ४ सय ७५ जना रहेका छन् ।
