दुलेगौंडा । भानुभक्त बहुमुखी क्याम्पसको ३९ बार्षिकोत्सव तथा अभिभावक दिवस समारोह भव्यताका साथ सम्पन्न भएको छ । क्याम्पसले शुक्रबार क्याम्पस परिसरमा भव्य कार्यक्रम गरी बार्षिकोत्सव समारोह सम्पन्न गरेको हो ।
बार्षिकोत्सव कार्यक्रमलाई सम्बोधन गर्दै गण्डकी प्रदेशका सभा सदस्यले व्यवहारिक शिक्षा र प्रविधिमैत्री शिक्षा आजको आवश्यकता रहेको बताए । विद्यार्थीले आफूभित्र रहेका अन्तरनिहित प्रतिभाले प्रष्फुटन गरेर पनि जीवन जीउन सक्ने हुदाँ विद्यार्थीको प्रतिभालाई उजागरण गराउन शैक्षिक संस्था अग्रसर हुनुपर्ने बताए ।
क्याम्पस सञ्चालक समितिका अध्यक्ष दुर्गाकुमार श्रेष्ठको सभापतित्वमा सम्पन्न कार्यक्रममा शुक्लागण्डकी नगरपालिकाका उपप्रमुख खुमबहादुर विक (राजु), समितिका उपाध्यक्ष एवम् शुकलागण्डकी–५ का वडाध्यक्ष दीर्घबहादुर थापा, पूर्व क्याम्पस प्रमुख कमल ढकाल, स्वभियु सभापति मिलन आले लगायतले मन्तव्य राखेका थिए भने कार्यक्रमको सञ्चालन क्याम्पसका प्राध्यापक पशुपति अर्यालले गरेका थिए ।
बार्षिकोत्सवको अवसरमा आयोजित अन्तर पालिका स्तरीय नृत्य प्रतियोगिता ज्ञान बगैचा प्रथम भएको छ भने पञ्चमुनिदेव माध्यमिक विद्यालय द्धितीय र खैरेनी मावि तृतीय भएको छ । प्रतियोगितामा प्रथम द्धितीय र तृतीय हुनेले क्रमश ः १० हजार, ५ हजार र ३ हजार साथमा प्रमाणपत्र प्राप्त गरेको छ ।
हरि खरेल बने पहिलो भानुभक्त तारा
तनहुँको शुक्लागण्डकी नगरपालिकामा रहेको भानुभक्त बहुमुखी क्याम्पसले बहुप्रतिभाशाली विद्यार्थी हरि खरेललाई पहिलो भानुभक्त तारा घोषित गरेको छ ।
क्याम्पसमा अध्ययन गर्ने विद्यार्थीहरु मध्ये विभिन्न क्षेत्रमा उत्कृष्ट क्षमता प्रस्तुत गर्ने एक विद्यार्थीलाई बर्षेनी भानुभक्त तारा सम्मान गर्ने निर्णय अनुसार खरेल सम्मानित भएका हुन् । क्याम्पसले शुक्रबार आफ्नो ३९ औँ बार्षिकोत्सवको अवसरमा उनलाई उपाधी सहित दोसल्ला, प्रमाण पत्र र माया चिनोले सम्मान गरिएको थियो ।
खरेलले उत्कृष्ट नजिता सहित यस क्याम्पसबाट स्नातक तह उत्तिर्ण गरेका विद्यार्थी हुन् । उनी पत्रकारिता, अध्यापन र कलाकारिता क्षेत्रमा समेत सक्रिय रहेका छन् । बार्षिकोत्सवको अवसरमा पुर्व क्याम्पस प्रमुख कमल ढकाल, मोतिप्रसाद पौडेल, क्याम्पसका पुर्वअध्यक्ष मोहन थापा लगायतलाई सम्मान गरिएको थियो ।
