पानी माग्दै ढोरवाराही मन्दिर

दुलेगौडा।  शितलवस्ती टोल विकास संस्थाको आह्वानमा लामो समय खडेरी परेको भन्दै बालबालिका, युवा, बयस्क लगायत जेष्ठ नागरीक सहितको उपस्थितिमा पानी माग्न ढोरवाराही मन्दिर पुगेका छन् । बालबालिका, युवा, बयस्क लगायत जेष्ठ नागरीक सहितको उपस्थितिमा टोलले गरेको नेतृत्वमा पानी माग्न ढोरबराही पुगेको समितिका सचिव रविलाल पौडेलले बताए । शितलवस्ती टोलमा जम्मा ६१ घर धुरी रहेको र सवैको सहभागितामा खर्चको व्यवस्थापन गरी कार्यक्रमको आयोजना गरिएको समितिका कोषाध्यक्ष विष्णुमाया गौतमले बताइन् । उनले भनिन् “ खडेरी परेको र किसानहरुले उत्पादन गर्न लगाएको कृषि बालीमा नराम्रो असर परेको भन्दै हामिले भजन कृतन सहित ढोरबाराही मातालाई पुकार्न आएका हौँ ।
समाजसेवी दामोदर रेग्मीले स्थानीय कला, संस्कृती , धार्मिक सम्पदाको महत्व आगामी पुस्तालाई सिकाउँदै ज्ञान, सिप, कला र आस्थालाई जिवित राख्न सुझाए । “परम्परागत मुल्य मान्यतामा विज्ञान लुकेको छ । हामिले यो कुरालाई बुझेनौँ भने हाम्रा पुस्तालाई के सिकाएर जान्छौँ त हामी ?” उनले भने ।
ढोरबाराही देवीको शक्ति अपार भएको र विगतमा पनि यस्तै खडेरी परेको बेला यसरी नै पानी माग्न आउँदा पानी परेको उदाहरण प्रष्ट भएको बताउँदै टोल विकास संस्थाका अध्यक्ष मेघनाथ पौडेल रोहितले यो एक किंवदन्ति मात्र नभई धार्मिक आस्था समेत रहेको बताए । बोली प्रष्ट नफुटेका बालबालिकाहरुलाई पनि ढोरबाराहि माताको दर्शन गराई यहाँ रहेको पवित्र कुण्डमा स्नान गराएमा बोली फुटेको दृष्टान्त दिदै उनले यस क्षेत्रको महत्व उजागर गर्न समेत यो कार्यक्रमको महत्व रहेको बताए । शुक्लागण्डकी नगरपालिका वडा नं. ९ का बडा अध्यक्ष धनबहादुर पुलामीले यस क्षेत्रको आस्था र विश्वासको केन्द्र ढोरवाराही देवीको शक्ति अपार रहेको बताए । उनले भने “ढोरबाराही मन्दिर यस क्षेत्रको मात्र नभएर देशकै धार्मिक गहना हो । यहाँको लहरी विश्वमा प्रख्यात छ । यस क्षेत्रको विकासमा तिनै तहको सरकारको समन्वयात्मक कार्यक्रमलाई जोड दिनु आवश्यक छ । ”