दुलेगौंडा । तनहुँको शुकलागण्डकी नगरपालिका–९ मा बुधबारदेखि पाँचौं संस्करणको ल्होसार कप सेभेन ए साईड नकआउट फुटबल प्रतियोगिता सुरु भएको छ । प्रतियोगिताको पहिलो दिन लिलाचोक युवा क्लब र बेलचौतार युवा क्लब बिजय भएको छ ।
उद्घाटन खेलमा लिलाचोक युवा क्लबले भ्याली युवा क्लब (वाइ) लाई २–० गोल अन्तरले पराजित गर्दै जित हासिल गरेको हो । पहिलो हाफमा १ गोल गर्दै अग्रता लिएको लिलाचोक युवा क्लबले दोस्रो हाफमा पनि पुन १ गोल गर्दै क्लबलाई जित दिलाएको हो । यसैगरी दोस्रो खेलमा बेलचौतारा युवा क्लबले दियालो युवा क्लबलाई २–० गोल अन्तरले पराजित गर्दै दोस्रो चरणमा पुगेको छ । पहिलो हाफमा दुबै टिम गोलरहित रहेता पनि दोस्रो हाफमा २ गोल गर्दै बेलचौतारा युवा क्लब दोस्रो चरणमा प्रवेश गरेको हो ।
ल्होसार कपको उद्घाटन कार्यक्रममा बोल्दै शुक्लागण्डकी नगरपालिकाका मेयर कृष्णराज पण्डितले खेलकुदको माध्यमबाट व्यक्तिगत तथा ठाउँको प्रचारप्रसारमा सहयोग पुग्ने हुदाँ नगरपालिकाले खेलकुद क्षेत्रको विकासमा आवश्यक सहयोग गर्दै आइरहेको बताए । साथै उनले नगरपालिकाको विकास निर्माणका बारेमा जानकारी गराउदै नागरिकहरु प्रकृतिमैत्री, प्रविधिमैत्री भई संस्कार र संस्कृतिको संरक्षण गरी आयाआर्जनमा जोडिने कार्यमा अगाडि बढ्न आवश्यक रहेको बताए । साथै उनले नगरपालिकामा क्लब, टोल, समूहले उत्पादनमूलक योजना माग गर्न आग्रह गरे ।
क्लबका अध्यक्ष सुबास शाही ठकुरीको सभापतित्वमा सम्पन्न कार्यक्रममा शुक्लागण्डकी नगरपालिकाका मेयर पण्डित सहित पूर्व वडाध्यक्ष लोकनारायण श्रेष्ठ लगायत विशिष्ट व्यक्तिहरुको उपस्थिति रहेको थियो भने कार्यक्रमको सञ्चालन क्लबका सचिव सुमन श्रेष्ठले गरेका थिए ।
प्रतियोगितामा विजेता टिमले नगद ७१ हजार साथमा शिल्ड, मेडल र प्रमाणपत्र प्राप्त गर्ने छ भने उपविजेता टिमले नगद ४१ हजार साथमा शिल्ड मेडल र प्रमाणपत्र प्राप्त गर्ने छ । प्रतियोगितामा उत्कृष्ट खेलाडी, उत्कृष्ट गोलरक्षक र उत्कृष्ट गोलकर्ताले नगद एक हजार ५ सय साथमा शिल्ड र प्रमाणपत्र प्राप्त गर्ने छ । प्रतियोगिता पौष १६ गतेसम्म सञ्चालन हुनेछ ।
