दुलेगौंडा । शुक्लागण्डकी नगरपालिका स्थित पृथ्वी राजमार्ग छेउमा रहेको शहीदको शालिकमा युवा समुहले माक्स लगाईदिएका छन् । पृथ्वी राजमार्गमा रहेको धुलो व्यवस्थापनको लागि नगरपालिकाले कुनै पनि कार्य नगरेको हुदाँ युवा समुहले शहीदको मुखमा माक्स लगाएर व्याङ्गयात्मक तरिकाले विरोध जनाएका छन् ।
स्थानीय सरकारले नागरिकको स्वस्थ्यप्रति कुनै चासो नदिएको युवा अभियान्ता शंकर पन्तले बताए । ‘हामी जिउदोलाई त हाम्रो स्थानीय सरकारले राम्रोसंग हेरेन । हामीले मानेका, पुजा गरेका शहीदहरुलाई सुरक्षित राखै, स्थानीय सरकारलाई ध्यानाकर्षण होस भनेर शहीदको मुखमा माक्स लगाउने कार्यक्रम गरेका हौं’ उनले भने ।
युवा समुहले दुलेगौंडाको विवि कोईरालाको शालिक, हलेदीको सहिद पार्कको शालिक र कोत्रेमा रहेको शहीद लालध्वजको शालिकमा माक्स लगाएका थिए । साथै युवा समुहले शुक्लागण्डकी नगरपालिकाका मेयर कृष्णराज पण्डित र उपमेयर खुमबहादुर विक राजुलाई पनि एक/एक पिस माक्स वितरण गरेका थिए ।
युवाहरुको कमिटी गठन
‘शुसासन र समृद्ध शुक्लागण्डकी निर्माणका लागि युवा अभियान’ को संयोजकमा शंकर पन्त सर्वसम्मत चयन भएका छन् । बुधबार गाछेपानी स्थिती मुक्तिनाथ शुक्लागण्डकी च्यवनधाम परिसरमा प्रथम भेला तथा अन्तरक्रिया कार्यक्रमले शंकर पन्तको संयोगकत्वमा १५ सदस्यीय समिति निर्माण गरिएको छ ।
कमिटीको सह–संयोजकमा जयराम लम्साल र विज्ञान भण्डारी चयन भएका छन् । यसैगरि कमिटीको सदस्यहरुमा कोमलबहादुर बानियाँ, विवेक वाग्ले, विपिन भण्डारी, सुवास पौडेल, यामबहादुर प्रधान, नारायण ढकाल, कुमार कार्की चयन भएका छन् । बाकी ४ सदस्य कमिटीको बैठकले निर्धारण गर्ने संयोजक पन्तले बताए ।
