दुलेगौंडा । देशकै नमुना विद्यालयको रुपमा स्थापित पञ्चामुनिदेव माध्यमिक विद्यालयको ५५ औं बार्षिकोत्सव तथा अभिभावक दिवस समारोह सम्पन्न भएको छ । विद्यालयले शैक्षिक, व्यवहारी सिप, संस्कृतिक नृत्य प्रस्तुत गरी भव्यताका साथ बार्षिकोत्सव सम्पन्न गरेको छ ।
कार्यक्रममा बोल्दै नेपाल सरकारका स्वास्थ्य तथा जनसङ्ख्या मन्त्री प्रदिप पौडेलले विद्यालय तहमा स्वास्थ्य तथा जनसङ्ख्या शिक्षा ऐच्छिक नभइ अनिवार्य गनुपर्ने आजको आवश्यकता रहेको बताए । मानिस सुखी र खुसी हुने प्रमुख आधार स्वास्थ्य रहेको हुदाँ विद्यालय तहदेखि नै विद्यार्थीहरुलाई स्वास्थ्य शिक्षाबारे जानकारी गराउनका निम्ति स्वास्थ्य तथा जनसङ्ख्या शिक्षालाई अनिवार्य गरिनुपर्ने उनको भनाइ छ । साथै उनले देशकै माटोमा रमाउने सक्ने र स्थानीय स्रोत साधनलाई परिचालन गर्न सक्ने शिक्षा प्रदान गर्नु आजको प्रमुख आवश्यकताको बिषय रहेको बताए ।
कार्यक्रममा बोल्दै गण्डकी प्रदेशका पूर्व अर्थमन्त्री जीतप्रकाश आलेले सामुदायिक विद्यालयले पनि शैक्षिक क्षेत्रमा उलेखनिय उपलब्धी हासिल गर्न सक्छ भन्ने छाप पञ्चमुनिदेव माध्यमिक विद्यालयले छाडेको बताए । साथै उनले विद्यालयको चौतर्फि विकासका लागि प्रदेश सरकारबाट आवश्यक सहयोग जुटाउन सधै तयार रहेको बताए ।
यसैगरी कार्यक्रममा बोल्दै शुक्लागण्डकी नगरपालिकाका नगरप्रमुख कृष्णराज पण्डितले विद्याथीहरुले पढाइ संगै व्यवहारीक सिप सिक्न पनि तयार हुनुपर्नेमा जोड दिए । नगरपालिकाले यस आर्थिक बर्षलाई शैक्षिक सुधारको बर्षको रुपमा स्विकार गरेको हुदाँ सोही अनुरुप नगरभित्रको विद्यालयको शैक्षिक र भौतिक पक्षको सुधारका लागि निरन्तर रुपमा लागि परेको बताए ।
विद्यालय व्यवस्थापन समितिका अध्यक्ष सन्तोष श्रेष्ठको सभापतित्वमा सम्पन्न कार्यक्रममा नगर उपप्रमुख खुमबहादुर विक (राजु), प्रमुख प्रशासकिय अधिकृत रामचन्द्र लाम्गादे, वडाध्यक्ष राजकुमार वाग्ले, पूर्व प्रधानाध्यापक धु्रवकुमार मल्ल, शिक्षा विकास तथा समन्वय ईकाइका प्रमुख उद्दबराज जम्मरकट्टेल, शिक्षाप्रेमी शेषमणी आचार्य, रघुनाथ पौडेल, युवा अभियान्ता शंकर पन्त,विद्यालयका प्रधानाध्यापक एकनारायण भण्डारी, विद्यालयका सहायक प्रधानाध्यापक विमल जोजिजु लगायतले मन्तव्य राखेका थिए । कार्यक्रममा विद्यार्थीको तर्फबाट सदीक्षा पुरीले विद्यार्थीको तर्फबाट मन्तव्य राखेकी थिइन् भने विद्यालयको शिक्षक राजेन्द्र लम्साल र टुकादेवी आचार्य पौडेलले कार्यक्रमको सञ्चालन गर्नुभएको थियो ।
विद्यालयको बार्षिकोत्सवमा विद्यार्थीहरुले शैक्षिक सामग्री प्रदर्शन, संस्कृतिक नृत्य प्रदर्शन, विभिन्न प्रकारका परिकारहरु बनाउनुका साथै विक्री वितरण समेत गरेका थिए । विद्यालयको बार्षिकोत्सव कार्यक्रममा चर्चित गायिका एलिना चौहानले आफ्नो संगीतिक प्रस्तुति राखेकी थिइन् ।
